SHILLONG:
U Myntri Rangbah ka jylla u Conrad K Sangma u la ïathuh ba shen un sa leit sha Nongbah Delhi ban ban ïakynduh ïa u Myntri ka sorkar pdeng ban ïakren halor ki mat ki ba bun khamtam halor ka mat Common University Entrance Test (CUET).
Haba kren sha ki ladpathi khubor u Sangma, u la ïathuh ba shen u Myntri rangbah ryngkat u Myntri ka tnad pule puthi ka jylla u Rakkam Sangma, kin sa leit sha Delhi ban ïakynduh ïa u Myntr ka tnad Pule jong ka sorkar pdeng u u Dharmendra Pradhan, ban ïakren halor ka mat CUET.
U la bynrap, “Kane ka jingïakynduh ka long ban pynsngew bad ban wad ïa ki lad ki lynti ban weng ïa ka jingeh ki samla pule ki ba mad halor ka mat CUET , ka ban kynthup ruh ban buh ïa ki center ha ka jylla baroh kawei”.
Dangshen, bun na ki samla pule ha ka jylla ,ki la mad ïa ka jingeh ka ba khraw ha ba ki la leit ban thoh ïa ka exam CUET namar ba ki la ai ïa ki jaka thoh examin ne ki centres sha kiwei pat ki jylla kum ha Kolkata bad Ranchi.
U la ong, “Ngi leit ban ïakynduh ïa u Union Minister ka tnad pule puthi ban ïakren halor ka mat ka ba la mih na ka CUET, bad ruh kin rah ruh ïa ka mat ka ba iadei bad ka tnad pule puthi ha ka jylla”.
U Myntri Rangbah ka jylla u la ong shuh shuh, ha ka jingleit sha Delhi, un ïakynduh ruh ïa u shongknor ka National Thermal Power Corporation (NTPC) ban ïakren halor ka tnad bording ha ka jylla .
“Ngi don ki katto katne tylli ki plan ha ka ba iïdei bad ka NTPC, ban peit ïa ka power plant ha ka jylla Meghalaya, ïa ka ba ngim pat lah ban batai bniah mynta halor kane ka bynta”u la ong.
U Myntri rangbah un leit ruh ban ïakynduh ïa ki ophisar ka International Solar Alliance. “Kane ka long halor ka jingpyntreikam ïa ka CM Solar Mission, ngin phaikhmat ba lada don ka lad ban ïatreilang halor kane ka Mission”, la bynrap u Sangma.
U Myntri rangbah un ïakynduh ruh ïa u Union Commerce Minister u Piyush Goyal ban ïakren halor unity mall project ha ka jylla Meghalaya. U Sangma un pyrshang ruh ban ïakynduh ruh ïa u Myntri Iada Ri u Rajnath Singh na ka bynta ban ïakren halor ka jingpynkynriah ïa ka jaka jong ka Cantonment Board sha ka Municipal Board.
“Ngi dang khmih lynti ban ïoh ban rah ïa kane ka mat ban ïakren bad u Union Minister halor kane ka mat, hynrei ngin pat ioh jingtip la ngi ïoh ne em ban ïakynduh”u la bynrap.
