GUWAHATI:
U Myntri Rangbah ka jylla Assam, u Himanta Biswa Sarma, ha ka 24 tarik Jymmang u la ïathuh ba naduh kane ka sngi, ka regional Committee jong baroh ar ki jylla kata ka Assam bad Meghalaya, kin sa leit ban jurip ïa ki hynriew tylli ki jaka ba dang sah kiba don hapdeng ka jingïakajia bad kin sa phah ïa ka kaiphod ha u bnai Naitung ha kaba yn sa don pat sa ka jingïalang ban khmih biang halor kane ka mat.
Haba kren sha ki lad pathai khubor hadien ka jingïalang ba ar jong baroh ar ki jylla halor ka jingpynbeit ïa u pud jong hynriew tylli ki jaka ki ba don hapdeng ka jingïakajia kaba la long ha Khanapara, Guwahati hynne ka sngi, na ka liang u Sarma u la pynpaw ka jingsngew skhem ba ka jingpynbeit pud kan long kham kloi ban ïa kaba khmih lynti.
Hynne ka sngi, ka dei ka sien ba nyngkong ban don ka jingïakren kaba ar halor ka jingpynbeit pud naduh ba u Conrad Sangma u la shah jied biang kum u Myntri Rangbah ka jylla. “Ha ka sien ba nynkong, ngi la ïakren ha ka kyrdan ba kham heh bad nga ngeit ba lyngba kane ka jingïakren bad ka jingshaniah markylliang, ngin sa lah ban pynbeit ïa ka mat kham kloi ban ïa kaba ngi khmih lynti,” la ong u Himanta.
Kumjuh ruh na ka liang u Myntri Rangbah ka jylla, u Conrad K Sangma u la ong ba ha ka jingïalang ba la dep ban long, ki nongïalam na baroh arliang ki la dep ban bishar bniah bad ban ïakren. “Ngi la dep ban bthah ïa ka regional committee ban sdang noh ban wad ïa ka jingshisha, ban ïakren bad ki ba don bynta bad yn shim ïa kajuh ka sienjam ha kiwei ki bynta, ban buddien ïa kaba la dep wad jingtip bad ngi khmih lynti ba shen ngin sa lah ban ïoh noh ïa ka kaiphod” u la ong.
Haba kdew ïa ka jingjia ba dang dep jia shen ha Khanduli, na ka liang u Conrad Sangma u la ong ba baroh ar ngut ki Myntri Rangbah kin sa leit ban jurip ïa ki jaka kiba don hapdeng ka jingïa kajia pud, khamtam ki jaka kiba don ha syndah ka Karbi Anglong bad West Jaiñtia Hills.
“Kane ka jingleit jurip kan long ban kyrpad ïa ki paidbah ban ïaleh ban don ka shongsuk shongsaiñ, ban pynskhem ïa ka jingshaniah jong ki bad katba dang ïaid ka jingïakren, nga kyrpad ïa ki paidbah ban don ka jingshongsuk. Ngi khmih lynti ba ha u bnai Naitung, ngin sa ïakynduh biang ban bishar bniah ïa ka kaiphod bad ka jingïaid jong ka kam ha ki komiti bapher bapher,” la ong u Myntri Rangbah ka jylla Meghalaya.
Shuh shuh u Sangma u la ïathuh ruh ba la bthah ïa ka Survey of India ba kan bteng ïa ka kam ban thew ban woh kumba la leh ha ka bynta kaba nyngkong. “Ngi la bthah ïa ki ban ïakren bad ki ophisar bad ki briew ha ki shnong ban pyndep kham kloi ïa ka jingthew jingwoh,” u la ong.
Haba kylli ïa ka por ba kan shim, u Myntri Rangbah ka Assam u Himanta Biswa Sarma u la ong ba kine ki hynriew tylli ki jaka ba don ha ka jingïakajia ki long kiba eh bad kiba thaiñ bad “kam long kaba ïahap ban buh por hynrei ngi la mynjur mynta ka sngi ba ngin sa ïakynduh ha u bnai Naitung ban bishar ïa ka jingïaid ka kam ba la leh da ki regional committees.”
“Kin don ki jaka ha kaba ngi lah ban poi kham kloi ha ka jingïapynbeit, hynrei kiwei pat kin shim por. Ngi la pynthikna ba ngin ym buh por hynrei ngi la rai ban ïakynduh biang ha u bnai Naitung,” la ong u Myntri Rangbah ka Assam.
Halor ka jingeh bad jingthaiñ ki jingïakren ha kaba ïadei bad ki hynriew tylli ki jaka ba dang don ha ka jingïakajia, u Sarma u la ong ba na kine ki hynriew tylli ki jaka, ki kynthup ruh ïa ka Langpih, ka Khanduli – Block I bad Block II.
“Ki paidbah na baroh ar jylla ki don ka jingsngew ktah halor kane ka mat. Bad ha ka liang ka Assam, ka jingkylli jong ka district council ruh ka don ha kaba ka sorkar Assam kam don bor eiei halor ka khyndew ka puta. Hooid, kine ki jaka kin long kiba jwat, hynrei kumba la ong u Myntri Rangbah ka Meghalaya – Haba don ka mon, ka don ka lad. Kumta, ngi la rai ban ïaid shakhmat ïa kane ka kam ha kajuh ka mynsiem jong ka jingïadei paralok,” la ong u Sarma.
