SHILLONG:
Ka Federation of Khasi Jaintia and Garo People (FKJGP) ha kine ki khyndiat sngi ba la dep ka la pynbna ban pynlong ïa ka jingïaid paidbah ban dawa na ka sorkar jylla halor kiba bun ki mat kiba ïadei bad ki khun samla jong ka jylla hi baroh kawei.
Ka kyrwoh ba la phah da u Vice President ka FKJGP, u bah Kitboklang Nongphlang, sha ki lad pathai khubor, ka la pynpaw ïa bun ki mat kiba donkam, kiba ka seng ka la pynsngew sha ka sorkar bad dawa ruh ban pynurlong kloi ïa kine katba lah.
Kawei na ki mat kiba ka seng ka dawa ka dei halor ka jingthung kam mardor bad ban pyndap ïa ki post kiba sah thylli kumba 3,000 (Lai hajar) tam, kumba u myntri rangbah ka jylla u la ai jubab hapoh ka ïingdorbar synrai kaba dang shu dep long shen. Ka seng ruh ka hukum ïa ka ophis jong ka MPSC bad DSCs ban pynsted ïa ka thung kam thung jam ha ki tnad bapher bapher jong ka sorkar.
Ka seng ka la dawa na ka sorkar jylla ban wanrah noh ïa ka ‘State Employment Policy’, ka ban treikam ha baroh ki ophis sorkar jong ka iylla, ki ophis jong ka sorkar pdeng kiba don ha ka jylla, ki Private Corporation/ Private companies/Private banks/ Sectors, kumta ter ter.
Ka seng ka la ong ruh ba kine ki kompeni shimet kin hap ban ailad shwa ïa ki samla trai ri, trai muluk bad ka dei ban don ka jingkhuid ha ka jingthungkam thungjam hapoh ka jylla. Kawei pat ka mat kaba ka seng ka dawa ka dei ban plie lad plie lynti ïa ki samla trai ri, trai muluk, lyngba ki ‘Skills Development Training Program’, bad lyngba kita ki ‘Job Oriented Training Program’, wat ha ki jaka pule bapher bapher. Ki dkhot ka seng ki la dawa ruh ba ka sorkar ka dei ban pynkylla ïa ki Youth Hostels kum ki Youth Recreation Center lane ki Career Guidance Center.
Ka seng ka la dawa ruh na ka sorkar ban thaw ïa ka ‘Meghalaya State Youth Commission’, khnang ba ki khun samla kiba kylla langkñia kin ïohlad ban ujor ban ïoh ïa ka jingbishar kaba hok ha ki bynta ki bapher bapher. Ka kyrwoh ka la ong ruh ba dei ban plie lad, plié lynti ïa ki samla ba kwah seng kam lajong da kaba kumno ki lah ban ïoh kham bun shuh shuh ïa ki skhim na ki tnad ai jingïarap bapher bapher. Kum ban shu pynkynmaw ba kane ka jingïaid paidbah jong ka seng kan long ha ka 28 tarik, Risaw 2022 bad kan sdang naduh ka por 11 baje mynstep, na Motphran bad yn pynkut da ka jingïalang paidbah ha Madan Iewrynghep, (Fire Brigade) Shillong.
