SHILLONG:
U Chief Executive Member (CEM) ka Khasi Hills Autonomous District Council (KHADC), u Bah Pyniaid Sing Syiem, u la ïathuh ba ka Council kan sa pan da ka jaka hapoh New Shillong TownShip, na ka bynta ba kan pynkynriah noh ïa ka ophis treikam ka Council sha kane ka thaiñ.
Haba kren sha kilad pathai khubor, u Bah Pyniaid, u la ong ba ka Executive Council ba thymmai kan ïaid sha khmat ban pan da ka jaka na ka Sorkar Jylla hapoh ka New Shillong TownShip, ban pynkynriah noh ïa ka ophis treikam ka KHADC sha kane ka jaka.
“Kane ka jingthmu ban pynkynriah noh ïa ka ophis treikam ka KHADC, ka long ba kane ka ophis kaba ngi don mynta ka la khapngiah bha bad ka la pynwit ïa ka jingtrei kam kiba bun namar ba kumba phi tip kane ka ophis ka kynthup ïa ki lai tylli ki tnad treikam ba khlaiñ bor, ka Executive Committee, ka Legislative Committee bad ka Judiciary bad namar ba la thynnian lut ha ka ne ka jaka ka ba rit kumta ka thud ka rukum treikam”, u la ong.
U la bynrap shuh shuh, “Kane ka rai ban pynkynriah ïa ka ophis treikam ka KHADC sha kane ka jaka ka long ruh namar ba baroh ki tnad sorkar jylla la bun ba kin rah lut sha ka New Shillong Town Ship, kumta ban kham pynsuk ïa ka leit ka wan jong ki paidbah lashai la shisngi kumta la rai ban rah lang ïa kane ka ophis treikam sha New Shillong da ka jingïatrei lang bad ka sorkar jylla”.
U Bah Pyniaid u la ong shuh shuh, “Ha ka ba ïadei bad kane ka jingthmu, ngi thaw da ka Committee bad ka tnad Council Building Asset, kane ka Committee kan sa shim khia ïa kane ka mat bad kan sa ïakynduh ïa ka sorkar jylla, ban ïakren halor ki jingdonkam ïa ka jaka ïa ka mang tyngka halor kine baroh”.
U la bynrap “Halor kane ka mat ka la don ka jingsdang na ka EC barim ha u snem 2019, hynrei na ka jingwan ka Governor Rule kane ka la pyndkhoh noh ïa kane ka jingthmu, hynrei mynta ka kynti da ka jingïarai lang baroh ki dkhot ka EC ngin ïaid shakhmat ban pynurlong ïa kane”.
Ha ba kylli halor ka building ba rim, u la ong “Ngam pat lah ban ong eiei ba kaei ka ban leh ïa kane ka building barim ka KHADC yn da la pynkynriah sha ka ophis thymmai hynrei lada shu shim ïa kane, ka dei ka jaka ba don ha ki jaka iew ngi lah ban pynlong ki jaka iew ruh ban pynmih ïa ka pisa na kane hynrei ïa kane hi ngim pat rai eiei mynta”.
