SHILLONG:
Ki seng saiñ pyrthei United Democratic Party (UDP) bad Hill State People’s Democratic Party (HSPDP) ha ka 31 tarik Jymmang ka la rai ban pynkhlaiñ ïa ka mynsiem jingïatylli jaitbynriew lyngba ka Regional Democratic Alliance (RDA).
“Ngi la rai kyllum ban nang pynkhlaiñ shuh shuh ïa ka mynsiem jingïatylli jaitbynriew lyngba ka RDA”, la ong u President ka seng UDP, u Bah Metbah Lyngdoh ha ryngkat ka jingdonlang u President ka seng HSPDP, u Bah KP Pangiang haba kren hadien ka jingïalang jong ar tylli ki seng saiñ pyrthei.
U la ong ruh ba ki nongïalam na baroh artylli ki seng saiñ pyrthei ki la ban jur halor ka jingdonkam ban ïatreilang halor ki mat bapher bapher haba ïadei bad ki jingeh hapoh ka jylla.
U Bah Metbah Lyngdoh u la ïathuh ba ki ar tylli ki seng saiñ pyrthei kin sa ïakynduh biang ban jied ïa ki dkhot ba thymmai jong ka RDA.
Haba kylli halor ka jingtrei synrop lang, u President ka seng UDP, u Bah Metbah Lyngdoh u la ong ba watla u la rai ban nym don ka jingiatrei lang ha ka elekshon MLA 2023 kaba la dep, “ngi don ka jingsngewthuh jingmut ba ngin sa lah ban don ka jingtrei synrop hadien ka elekshon”.
“Kumta , ki ar tylli ki seng saiñ pyrthei kum ka RDA kin sa ïatreilang bad kin shim rai lang ban pynksan ïa kano kano ka mat hapoh ka jylla,” u la bynrap.
Ka seng UDP baroh ki don 12 ngut ki MLA katba ka HSPDP ka don 2 ngut ki MLA ha ka Ïing Dorbar Thaw aiñ jong ka jylla
