SHILLONG:
U nongïalam ka Harijan Panchayat Committee (HPC), u Gurjit Singh, u la ïathuh ba ka Harijan Committee shen kan sa pynpaw ïa ki nongrim jong ka hadien ba la ïoh ïa ki jingai jingmut na u nongsaid aiñ halor ka Blueprint ba la phah ka sorkar ban pynkynriah ïa ki na Them Ïew Mawlong.
U Gurjit Singh ha ba kren bad ki ladpathai khubor u la ong “Na ka liang ka HPC kan sa pyntip halor kane ka bynta, tang hadien ba ki la ïoh ban ïakren bad bishar bha shwa bad u Muktiar jong ki”.
Lah ban kdew hangne, ha ka 07 tarik u Jylliew ka Ïingkashari Meghalaya High Court, ka la pyntip ba ka Harijan Panchayat Committee (HPC), ka pdiang ïa ka blueprint jong ka sorkar ,hynrei ka kwah ba ka sorkar kan pdiang ïa ki katto katne tylli ki jingaijingmut na ka.
Ha ka hukum bala pynmih da ka Ïingbishar, ka Division Bench ka Ïingkashari Meghalaya High Court, bala khlieh da u Chief Justice Sanjib Banerjee bad Justice W Diengdoh ka la ïathuh ba ka Harijan Panchayat Committee ka la mynjur ïa ka Blueprint jong ka sorkar .”U Advocate General u la pyntip ba ka Harijan Panchayat Committee kala mynjur ïa ka blueprint ba la pynkhreh da ka Sorkar jylla hynrei kala buh ïa ki jingai jingmut ban pynkylla ïa katto katne ki bynta jong ka”, ong ka kashari.
Ka Ïingkashari ka la buh ban shong bishar biang ïa kane ka mukotduma ha ka 3 tarik u Naitung, 2023.
Lah ban pynkynmaw ba na ka liang ka sorkar jylla ka la phah ïa ka blueprint sha ka HPC, ban pynkynriah ïa ki 342 tylli ki longïing jong ka jaitbynriew Harijan ki ba shong ba sah ha Them Ïew Mawlong sha ka jaka jong ka Shillong Municipal Board (SMB).
Ha ka ba ïadei bad kane,ka Sorkar ka la rai ban pynshna da ki ïing bun mala ha ka jaka ba heh 2.5 akar, ha Cotton Bishop Road ka jaka ba don ka ophis Shillong Municipal Board (SMB) katba na ka liang ka HPC ban kynriah noh ïa ki na Them Ïew Mawlong ka, ka la pan na ka sorkar 200 square meter ka jaka na ka bynta kawei pa kawei ka longïing, ban ai bai shna ïing shaki, ban ai ai jaka ïa ki hapoh ka European Ward.
