SHILLONG:
U Myntri Rangbah ka jylla u Conrad K Sangma, ha ka 7 tarik Jylliew, u la ong ba kum shibynta ban kiar na ka jingduhnong ki khun samla ki ba wad kam wad jam ha ka jylla, ka sorkar ka la shim ïa ka rai ban bteng ïa ka jingthungkam hadien ba la pynkylla thymmai ïa ka Office Memorandum (OM) 2022 halor ka Reservation Roster, katba ka jingbishar ïa ka Reservation Policy kan dang ïaid shakhmat.
Ha ba kren sha ki ladpathai khubor, halor ka Expert Committee, u Myntri Rangbah ka jylla u Conrad K Sangma u la ïathuh, ba ha ka jingïalang jong ki kynhun myntri, la ai ka jingmynjur ban thung ïa u Chief Secretary bad uwei u dkhot na ka tnad Aiñ bad uwei u dkhot na ka tnad Personnel na ka bynta ka Search Committee, kane ka Committee ka long ban wad ïa ki experts ki ban long ki dkhot jong ka Expert Committee ka ban pynbeit ïa ka Reservation Policy.
“La ai jingmut ruh ba ha kane ka Expert Committee, dei ban kynthup ïa ki san ngut ki dkhot ki ba la tbit ha la ka jong ka kyrdan katkum ba la pynmih ha ka notification bad na ka liang ka sorkar ka la bthah ïa ka Search Committee ban kan pynkloi halor kane ka bynta ban jied ïa ki kyrteng jong ki briew ban long ki dkhot ka Expert Committee”, u la ong.
Haba kylli halor ka jingdawa ban thung ïa ki dkhot ka Expert Committee da ki briew na ka jylla u Myntri Rangbah ka jylla u la ong, “Halor kane ka jingdawa ka Search Committee kan sa bishar”.
U Myntri Rangbah u la ïathuh ruh ba ha ka jingïalang la pdiang ruh ïa ka jingpynkylla thymmai ïa ka Office Memorandum (om) 2022, halor ka reservation roster, katkum ka jingai jingmut na ka All Party Committee bad kane ka jingpynkylla yn pyndep noh ha ki ar sngi bad hadien kane ka jingpynkylla yn sa sdang noh ïa ka jingthungkam hapoh ka jylla.
Haba kylli halor u snem ba kin pyntrei kam ïa ka roster u Myntri Rangbah u la ong “Halor u snem nga la ong da ka ba shai naduh nyngkong, ba ka roster ka dei ka process ka ba hap ban bteng, kaba la sdang naduh u snem 1972, bad ka dei ka ban hap ban bteng ïa kane hynrei ha kine ki snem ba la dep ki don ki post ki ba la pyndap katkum ka jinglong jingman bad ki jaitbynriew (Khasi-Garo) ha ka jylla hynrei la ka long kumno kumno ruh ïa kine ki post la ju pyndap”.
“Hynrei ka jingdonkam ban pynbeit katkum ka Roster, ka long ban ïoh jingtip ïa ki jingkheiñ ba ngi don haei mynta? Bad kane ka jingkheiñ roster kan ai jingtip ba ngin sdang ban pyntreikam biang naei ïa kane; kumta ka jingpynbna kan sa mih na kata ka serial number bad kane ka jingthmu ban bishar naduh u snem 1972, haba don ki jingtip ngin sdang nangta bad lada ym don ngin sdang naduh nyngkong”, u la bynrap.
U Conrad u la ong shuh shuh “Hadien ba la dep ban pynbiang ïa ka roster ka jingthungkam kan sdang noh, namar ïa ka jingthungkam ym lah ban pynsangeh; lada pynsangeh shwa ïa ka jingthungkam mynta, bun na ki samla ki ba wad kam bad ki ba la apply kam mynta kin shem jingeh namar ka snem kan ym ïahap shuh katba nang ïaid ki sngi; bad kan long ka jingduh nong ïa ki kumta ka jingleh ka sorkar ka long ban pynthikna ba ki khun samla kin ïoh ïa ki kam ki jam”.
Haba kylli halor ka jingdawa ban pynsangeh shwa ïa ka jingthungkam katba ym pat lah ban pynbeit ïa ka reservation policy, u Myntri Rangbah u la ong, “Ka jingthungkam kan sdang noh tang shu dep ban pynkylla thymmai ïa ka office memorandum katba ka jingbishar ïa ka reservation policy ruh kan dang ïaid sha khmat”.
Haba kylli halor kane ka jingai jingmut ban pynkylla thymmai ïa ka OM, u la ong “Kan don ka jingpynrung ïa ki katto katne ki jingpynbha bad ngin sa pyntip halor kine ki jingkylla lashai lane la shisngi, hynrei kane ka jingai jingmut ka dei ka ba la ai sha ka All Party Committee ka ba dang shu dep ka jingïalang”.
