SHILLONG:
Ka Sorkar Meghalaya mynta ka lap ïa ki lad ki lynti kumno ban pynduna ka jingpynjakhlia ïa ka suinbneng kan sa pyntrei kam ïa ki ha ki jaka ba donkam. Ïa kane ka lad pynkhuid ïa ka jingjakhlia jong ka lyer ym sdang nyngkong na ki thaiñ Byrni jong ka Ri Bhoi kiba long ki jaka ba don bun ki kharkhana kiba pynmih ïa ki lyer jakhlia. Kane ka jingsdang ban pynkhuid ïa ka lyer jakhlia na ki bynta jong ka Byrni ka long namarba la shem ka jingjingjakhlia jong ka lyer ka la hap mynta ka ka kyrdan “poor category”.
Ki heh Sorkar jong ka tnad Forest bad Environment ki la ïathuh ba ka jinglong jong ka lyer ha ki thaiñ Byrni ka long hapdeng ka kyrdan “moderate bad poor”. Ha ka poor barkhiang ka suinbneng, ka jinglong jong ka lyer ka hap ha ka kyrdan “poor” bad ha ka por lyiur na ka daw jong u slap ka jinglong jong ka suiñbneng ka kham bha khyndiat bad ka hap hapoh ka kyrdan “moderate”.
Kane ka long ba u slap u sait noh ïa ki jingjakhlia kiba per ha suin. Ka jinglong jong ka lyer ha ki thaiñ Byrni ha ka hap ha ka kyrdan “poor” ka dei na ka daw jong ka jingbun palat ki karkhana ha kitei ki jaka khappud hapdeng ka Meghalaya bad Assam. Ki heh Sorkar ki la ïathuh ruh ba ha ki khappud Assam shiliang jong ka Byrni, ki don haduh 55 tylli ki karkhana bad ha ki thaiñ Byrni jong ka Assam ki don 20 tylli ki karkhana.
Dang shen ka tnad Forest bad Environment ka la pyllong ïa ka jingïamir jingmut ha Shillong bad ha Byrni halor ka jingjakhlia jong ka lyer. Ha kitei ka jingïakren la ïathuh ba ka lyer ha Shillong ka hap ha ka kyrgan “good”. Haba kylli shaphang ki karkhana kiba don ha Jaiñtia Hills, kine ki heh Sorkar ki la ong ba kim da khuslai than ïa kitei ki karkhana kiba don ha East Jaiñtia Hills.
Kine ki heh Sorkar ki la ong ba ki karkhana ki dei ban bud pyrkhing ïa ki kam ïa ki aiñ khnang ba ka lyer kan long kaba khuid ha kaba ki briew ki lah ban ringmynsiem khlem da ïoh pang.
