NONGSTOIÑ:
U MLA ka Nongstoiñ u Bah Macmillan Byrsat, ha ka 19 tarik Nohprah u la plie ïa u Mawnongrim na ka bynta ban shna pynbha ïa ka surok na lad Nongstoiñ College sha ka jaka shong neh jong ka Rev. S Wollington Children’s Home ha Nongpyndeng.
Ïa kane ka surok kaba jngai kumba 1.118 KM la bei pisa da ka World Bank ha ka mang pisa kaba la kot haduh 129.860 lak tyngka ïa kaba yn sa pyntrei lyngba ka Meghalaya Integrated Transport Project (MITP) bad ha kane kajuh ka sngi u MLA u la ïoh ruh ban aiti ïa ka kali sha ka Rev. S Wollington Children’s Home.
Haba ai jingkren ha katei ka jingïalang u MLA ka Nongstoiñ u Bah Macmillan Byrsat u la ong ba na ka por sha ka por u Pastor Diengngan u shait pynkynmaw ïa u halor ka jingdonkam ban ïoh ïa kane ka surok na lad College sha Pyndengdewsaw kaba don ka jaka shongneh jong ka ïing ki khunswet.
U la ong ruh ba ha ka jingshisha u Symbud Myntri Rangbah ka Jylla u Prestone Tynsong u la wan sha Nongstoin ban buh Mawnongrim na ka bynta ban pyntrei noh ïa ki surok hapoh ka sor Nongstoiñ, hynrei kane ka jingbuh Mawnongrim kaba mynta ka sngi ka long kum ka dak ban pynsah kynmaw ïa kane ka Home.
U MLA u la ong ruh ba hadien bala ïoh ïa ka surok ka home ka donkam sa ka kali bad kum u nongmihkhmat u la pynsngew ïa kane sha u MR ha kaba tang 5 sngi la mang pisa na ka bynta ka kali ha kaba u MLA u la ïarap ruh ban pynïoh sha ka Home.
U MLA u la ong ba shibun ki jingdonkam ba ka home ka dang donkam hynrei kum u MLA u ba don ïa ka jingkitkhlieh un ïai peit bad khmih na ka bynta ki jingdonkam jong katei ka Home.
Ha kane ka jingïalang plie Mawnongrim kaba la long hapoh ka ïing dorbar ka shnong Mawkhlam Nongpyndeng la ïadon ryngkat lang ruh u DC ka WKHD, ki ophisar ka tnad PWD, u SDPO, ki Pastor ka KJP Synod Sepngi, ki riew rangbah ka thain ki nongpynïaid bad khun hep ka Rev. S Wollington Children’s Home bad kiwei kiwei.
