SHILLONG:
Ka sorkar Meghalaya ryngkat ka tnad jngohkai ka la tyrwa ban shna ïa ka lynti tyllai suiñ ne Ropeway na Lum Shyllong sha Riat Laban kaban kot sha ka T.138 klur. Ïa kane ka lynti suiñ yn shna na Shillong Viewpoint sha Forest Nursery Rait Laban bad kan dei kaba nyngkong tam ha ka jylla.
U Myntri Rangbah ka jylla u Conrad K Sangma u la pynïaid ïa ka jingïalang aiti ïa kane ka kam ha ka 16 tarik Kyllalyngkot kaban sa sdang noh shen.
Ïa kane ka lynti tyllai suiñ yn shna ha ka jingheh ka jaka kaba 1.34 Hektar kynthup ka Lower Terminal Point (LTP) ha Forest Nursery Rait Laban ha ka jingheh kaba 11146.96 sq. m ha u altitude ba 838 m na duriaw ha kaba kin don ka Station Building, Concourse, Maintenance Room, Ticket Room cum Office, Store Room, Security Room, bad jaka ïeng kali bad kiwei. Katba ha Upper Terminal Point (UTP) la thmu ban shna ha ka jingheh kaba 2025 sq. m ha u altitude ba 1633 m na duriaw bad yn shna ïa ka Station Building, Concourse, Ticket Room cum Office, Maintenance Room, Waiting Area, Food Court bad kiwei. Yn shna 9 tylli ki Tower ha ka jingheh kaba 251.17 sq.m. Kane ka lynti tyllai suiñ ka dei ka Monocable Detachable System kaba la shna ha ka dur kum ka lieng.
Haba kren ha kane ka jingïasoi bad aiti ïa ka kam, u Myntri Rangbah u Conrad K Sangma ula ong ba ka kam jngohkai ka dei kawei kaba kyntiew ïa ka kam jngohkai ha ka jylla bad kumjuh sha jaka nongkyndong. “Ngi la pyntreikam ïa ka skhim shna ïingbasa ha kaba 2500 tylli ki ingbasa la shna ha ka jylla. Ngi la ai jinghikai ban pdiang ïa ki briew, bad kumjuh la plie ruh ïa ka 5-Star Hotel bad ki kali rem dor na bynta ki nongwankai. Kine ki la ai kam da ki hajar ïa ki samla ha ki jaka nongkyndong bad kumjuh ha sor, kaba la pyllong ïa ka Meghalaya kum ka jaka jngohkai kaba pawnam”, la ong u Conrad.
Ka jingshna ïa ka lynti tyllai suiñ ne Ropeway kan dei sa kawei ban khring ïa ki nongwankai sha ka jylla. “Nga ai khublei ïa ka Rait Laban Dorbar Pyllun kaba la ai jaka ban pyntreikam ïa kane ka projek”, u la ong.
