SHILLONG:
U Myntri ka tnad Social Welfare, u Bah Paul Lyngdoh, ha ka 15 tarik Jylliew u la ong ba ka sorkar kan sa thung ïano ïano ki bym dei na ka saiñ pyrthei bad kiba sngewthuh ïa ki mat jong ki kynthei, kum ka chairperson kaba thymmai jong ka Meghalaya State Commission for Women (MSCW).
U Bah Paul u la ong ruh ba ka hukum jong u ban weng noh ïa ka chairperson ba mynta ka Kong Phidalia Toi kam dei kaba la leh namar ki khubor hamsaïa bad u la ong ruh ba u kham mon ba un long uba dei ban ïa kaba pawnam halor kane ka mat.
Kane ka jingkren jong u ka la long shi sngi hadien ba ka MSCW ka la kynnoh ba ka jingshah weng kam ka chairperson ka long kaba lyngngoh bad ba u Myntri ba dei peit u la ïoh pdiang ïa ki jingtip ki bym biang kiba ong ba ka chairperson kam shym la wan ha ki 3 tylli ki jingïalang na ki 4 tylli ki jingïalang jong ka Commission.
Haba kren sha ki lad pathai khubor, u Bah Paul u la ïathuh ba ka tnad kan thaw mynta ïa ka search committee na ka bynta ka jingthung ïa ka chairperson bathymmai jong ka MSCW.
“La kdew ruh bunsien ha ki lad pathai khubor ba balei phi jied ïa ki briew tang na ka saiñ pyrthei, kata ka dei ka mat kaba phi la ju bat kumta mynta ka jingmut jong ka sorkar ka long ban thung ïano ïano ki bym dei na ka saiñ pyrthei, kiba lah ban trei, kiba sngewthuh ïa ki mat jong ki kynthei. Kita ki dei ki bynta kiba ngi la buh bad ngin leh halor kita ki bynta,” u la ong.
