PYNURSLA:
U Symbud Myntri Rangbah ka jylla ba dei ruh u Myntri ka tnad PWD (Roads), u Bah Prestone Tynsong, ha ka 15 tarik Ïaïong u la bthah ïa ki bor peit distrik jong ka East Khasi Hills ban ujor ejahar bad registar case halor ka jingtwa u lum ha ka 14 tarik Ïaïong ha ka bynta jong ka surok Shillong-Dawki ha Rngaiñ hajan Pynursla.
“Hadien ba la registar case, yn bud da ka jingtohkit ban lap mano ba dei ban kit khlieh na ka bynta kane ka jingtrei torti, la ka long ka National Highways & Infrastructure Development Corporation Ltd. (NHIDCL) lane ka kompani ba pyntrei ïa kane ka projek, kata ka ARSS Infrastructure Projects Ltd, bad hadien yn sa leh ïa kaba donkam,” la ong u Bah Tynsong hadien ka jingjurip ïa kane ka jaka.
Ha ka jingtwa u lum ha ka janmiet jong ka 14 tarik Ïaïong, ar ngut ki rangbah ki la shah taplup ha kane ka jingjia, ha kaba ka kali kaba ki shong ka la shah lynthem ha ki maw. Ïa kine ki ar ngut ki rangbah, uwei na ki la ong ba u dei u Rangbah Shnong ka shnong Wahlyngkhat, ym shym la lap haduh mynta.
Haba kylli halor ka jingshim por ban pynkhuid ïa ka surok, u Bah Tynsong, uba long ruh u MLA kane ka thaiñ, u la ong ba ka thong kaba kongsan ka long ban lap ïa ki rangbah kiba dang jah. “Kane ka dei ka jingtwa lum kaba shyrkhei. Ïa mynta ngin pyrshang ban sei ïa ka met jong ki rangbah bad hadien kata ngin sa pyrkhat kumno ban pynkhuid ïa ka synrum. Ngim lah ban pynkhuid ïa ka bynta jong ka surok namar ba ka kynhun ba wad bad ruh ki volunteer na ki shnong bapher bapher ki dang ïa wad ïa ki ar ngut ki rangbah,” u la ong.
U Bah Prestone Tynsong, u la bthah ruh ïa ki arngut ki engineer jong ka NHIDCL, kiba don ha kane ka jaka ban wanrah mar mar ïa ki riewshemphang na IIT-Guwahati ban pule ïa ka jinglong jingman jong ka khyndew ha Rngaiñ shuwa ban pynïaid shakhmat ïa ka jingpyntrei jong kane ka surok.
Haba kylli la yn ai ïa ka bai lutksan sha ki bahaïing jong kine ki arngut ki rangbah, u Bah Tynsong u la ong, “Ai ngin nym pat ïakren shaphang kata ïa mynta. Ka long kaba kloi eh. Kumba nga ong, ki riewshemphang na IIT-Guwahati kin sa pule bha shuwa shaphang ka jinglong jingman jong kane ka khyndew bad ka jaka bad ngan sa buh ïa ka jingïalang ha ka 17 tarik Ïaïong ban bishar bniah bad syllok halor kane ka jingjia”.
Kane ka surok ba jrong ka hap hapoh ka bynta jong ka surok Shillong-Dawki kaban pynïar ïa ka surok hapoh ka NHIDCL, ha kaba la pynkup nam ïa ka jingpyntrei jong ka kam sha ka ARSS Infrastructure Projects Ltd.
