SHILLONG:
Hapdeng ka jingiphuh iphieng ka Shad Suk Mynsiem ka ba 112 jong ka Seng Khasi Kmie ba la pynlong ha Lympung Weiking, Jaiaw, ka la poi sha ka ba kut noh ha ka 10 tarik Ïaïong.
Ha kane ka sngi, ki la don haduh 1451 ngut ki nongshad ki la wan ban ïashim bynta ki ba kynthup ïa ki 727 ngut ki shynrang bad 724 ngut ki dei ki kynthei. Mynta u snem ka Shad Suk Mynsiem ka la kynjoh sha ka 112 snem naduh ba la pynlong ïa ka ha u snem 1911 ha Lympung Weiking, Jaiaw.
La wan sakhi lang ha kane ka sngi da u Lat ka jylla u Phagu Chauhan, ha ryngkat ka jingïadon lang u Symbud Myntri ka jylla u Bah Prestone Tynsong, u Chief Executive Member (CEM) ka Khasi Hills Autonomous District Council (KHADC) u Bah Titos Chyne bad u DGP ka jylla u Dr. Lajja Ram Bishnoi bad kiwei kiwei.
Haba kren sha ki lad pathai khubor ha kane ka sngi, u Bah Bantei Rumnong u Chairman publicity Secretary Seng Khasi Kmie, u la ong, “Kane ka shad ka dei ka niam jong ki khun Khasi Khara kiba ksoh ba bat ïa ka niam tynrai bad ka dei ka jingshad ka ba pynïajan ïa u bynriew bad la u Trai Nongbuh Nongthaw”.
“Ha ba shimbynta ïa kane ka shad dei ban kheiñ kyntang khnang ba kane ka shad kan long kaba phuh ba phieng hapdeng ka jingtip briew tip Blei ban don ka akor ka burom bad ban pynphuh ïa la ka lariti”, u la ong.
U la bynrap shuh shuh ba “Ka jingwan hangne ban shim bynta ka long ban shad suk mynsiem ban hun mynsiem ban ainguh ïa u Blei ban ïoh ïa ka bha ka miat bad ban pan ka jingkyrkhuh na ka bynta u snem ban wan”.
Ha ba kylli u la ong ruh ba ka Seng Khasi Kmie ka donkam ïa ka jaka shad ka baheh na ka jingbun ki nongwan shim bynta ban shad bad halor kane ka Seng Khasi Kmie ka dang wad ïa ki lad ki lynti ban ïakren bad ki bor ba pher bapher ki ba lah ban ai ka jingïarap ban pynheh bad ka Seng Khasi Kmie kan wad ïa ki lad ki kynti ban ïoh da ka madan ba thymmai.
Ha kawei pat ka liang ka Kong Saloni Bareh ka dkhot ka Seng Khasi Kmie, ka la ong ba lyngba ka Shad Suk Mynsiem kin pynneh pynsah ïa ka riti ka dustur ha baroh ki liang ha kaba ïadei bad ka shad ka kmen bad ha ka akor ka burom.
Ka la pynpaw ïa ka jingkyrmen ba une u snem, haduh ban da ïakynduh biang, un wanrah ïa ka koit ka khiah ha ka met bad ka mynsiem, ba ka jaitbynriew kan nang kiew shakhmat ryngkat ka akor ka burom.
