SHILLONG:
Ha ka rynsan jong ka Miss Northeast 2022, kaba dei ka finale bad la pynlong ha Nagaland myn ha ka sngi Palei, la ïohrah ïa ka namjop da ka Irene Dkhar kaba na ka jylla Meghalaya.
Ka Irene Dkhar na Meghalaya ka la ïoh deng ïa ka pansngiat jong ka Miss Northeast 2022 ha ka por ba pynlong ïa ka jingïakop thei bhabriew ha Kohima ba don ha Nagaland myn ha ka sngi Palei.
Ha katei ka rynsan, la ïashim bynta haduh 15 ngut na ka thaiñ lam mihngi na ka bynta ban ïaknieh ïa katei ka nam.
Kane ka dei ka sien ba nyngkong ba la pynlong ïa ka jingïakop Miss Northeast, kaba la pynïaid da ka North East Beauty Pageant Organisation bad la wanrah da ka Beauty and Aesthetic Society of Nagaland (BASN).
Ïa katei ka rynsan, la bei tyngka da ka sorkar jong ka Nagaland.
Katei ka nongjop ka la ïohpdiang da ka pisa kaba la kot haduh T. 1.5 lak ryngkat bad ki jingai sngewbha.
Ka rynsan jong kane kan sa jia biang ha Sikkim.
Haba kren shaphang katei ka show, ïa ka nam First runners-up, la ïoh da ka Eshanee Hatimuria na Assam. Katba ha ka Second runners-up, la ïoh da ka Dyna Jomo na Arunachal Pradesh.
Sa kiwei pat kiba ïohpdiang ïa kiwei ki bynta kum ki sub-title ki kynthup kine harum:
Miss Photogenic – Eshanee Hatimuria(Assam).
Miss Perfect 10 – Irene Dkhar(Meghalaya).
Miss Talent – Eshanee Hatimuria (Assam).
Queen of Hearts – Lika Chophy (Nagaland).
Miss Beautiful Skin – Mannasha Devi Sapam (Manipur).
Miss Multimedia – Dyna Jomo (Arunachal Pradesh).
