SHILLONG :
Hadien ka jingsakhi ban poi sha ka thong halor ka jingpynlong ïa kane ka tamasa ha une u snem ba la dep, ka sorkar jylla ka dei kaba la pyntip ba ka tamasa Winter Tales kaba lai yn pynlong mynta u bnai. Ïa kane ka tamasa la wanrah da ka Meghalayan Age Limited bad shimkhia ban pynlong da ka Dak_ti Craft bad ïa kane ka tamasa yn pynlong na ka bynta lai sngi kynthih ha nongbah Shillong ka ban sdang naduh ka 19 bad kut ha ka 21 tarik u Nohprah ha kawei na ki jaka jngoh kai ha Ward’s Lake.
Kane ka tamasa Winter Tales ka dei ka prokram na ka bynta ki riewdonsap ha ka jingpynleit jingmut ban plie lad na ka bynta ki nongseng kam lajong bad ki kynhun kiba ju don bynta ban pynmih ïa ki tiar kiba shna bad thaiñ kti jong ka jylla khnang ba kin lah ban pyni ïa ki sap ki phong jong ki, halor ki jait jingshna bapher bapher, ki jingbam bad kumjuh ruh halor ka rwai ka siaw. Kaba kham kongsan ka dei halor ka jingbuh ka thong ban wallam h alor ka jinglah ban pynmih pli bad ban lait na ka jingpynlehnohei.
Ka jingpynlong ïa kane ka tamasa ha ki por ba la dep ka dei kaba la pynlong halor ka jingpynleit jingmut ban wallam ha rynsan ïa mawlynnai ba rieh ha ka jylla, kiba pyndap ïa u thiar ka Lariti bad dei bad ban kyntiew halor ki nongseng kam lajong ba ïadei bad ki tiar shna kti, ki jingthaiñ jaiñ, ka tem ka put, ki jingbam tynrai, ka thoh ka tar bad kiba bun kiwei de ki sap kiba lah ban shem tang ha kum kine ki tamasa jong ka Winter Tales!
Ha ka jingkdew ba kane ka prokram ka long kaba kham pher, la pynpaw ka la don ka jingshimkhia ban pynthikna ba ïa ki dukan bad kiba yn ïashim bynta ki dei ki ban pyni ïa ka sap tynrai bad ka Lariti jong ka jylla.
Ïa ki ticket lah ban ïoh lyngba ka website www.wintertales.in bad baroh kaba mih na ka jingdie ïa ka tiket yn noh synñiang sha ka jaka ri khunswet bad ka jaka sah ki tymmen. Yn pyllait ei na ka bynta ki khynnah kiba hapoh ka 10 snem ka rta.
