SHILLONG:
U nongrwai ba pawnam jong ka Assam, u Papon mynta u la kylla long u nongshna phlim bad u la dep thaw ar tylli ki phlim ha ka thaiñ shatei lam mihngi jong ka India.
Ki phlim kiba la shna da u Papon mynta la don 4 snem, ki kynthup ïa ka ‘The Land of the Sacred Beats’ bad ka ‘The Mystical Brahmaputra – A Musical Story’.
Haba ïakren shaphang kitei ki phlim, u Papon u la ong: “Baroh ki tip ïa ka jingieid jong nga ïa ka India bad khamtam ha ka thaiñ shatei lam mihngi. Nga kitkhia ban ïalam ïa ka thaiñ shatei lam mihngi ba kan kiew sha kiwei pat ki ri jong ka pyrthei.”
“Ka jingshem ban shna kum kine ki phlim ka long kaba wan ka jingkylla dur ha ka jingim. Ngi la dep ïaid lynti ban leit shangkai pyrthei mynta la don da ki snem na ka bynta ban wad bniah bad ban ring ïa ki phlim. Nga kyrmen skhem ba lyngba kane ka phlim, ngin lah ban pynkiew ïa ka kam jngohkai pyrthei bad ka kolshor, hynrei ban pynkiew ïa ki khana ba sngewtynnad.”
Utei u nongshna phlim u la shah khot sngewbha sha ka Cannes Film Festival kum u nongkit ktien ïa ka lariti jong ka Assam. Ïa ka jingpyni lyngkot ïa ki phlim ba pynmih u Papon, la dep ban pyni paidbah ha India Pavilion ha ka March du Film na ka bynta ban rakhe ïa ki tynrai jong ki phlim ha Assam.
