SHILLONG:
Ka Miss Meghalaya Organization, hapoh ka jingpynïaid jong ka Meghalaya Youth Tourism Development Society, sa shisien, kan sa pynlong ïa ka jingïa kop ïaid thei bhabriew, kaba tip kum ka Miss Meghalaya and Miss Teen Meghalaya 2023. Katei ka rynsan ïakop thei bhabriew kan da sdang da kaba shim ïa ka interview ne Audition ha ka 12 tarik Nailar 2023 ha Youth Hostel Shillong. Katba ki nongjop ha kane ka Miss Meghalaya and Miss Teen Meghalaya, kin sa mihkhmat na ka bynta kane ka jylla bad na shabar jong ka jylla. Ïa ka Grand Finale, yn sa pynlong ha ka 9 tarik Nailur 2023 ha U Soso Tham Auditorium. Yn sa don ruh ka jingïaid ïakop pyni riam pyni beit ba la pynwandur da ka kompeni Butterfly Clothes and Accessories. Nalor katei ka rynsan, ki nongjop kin sa ïohpdiang ruh ïa ka pisa kaba haduh T. 2.80 lak.
Katei ka jingïa kop ïaid thei bhabriew ban neh shi bnai kan sa sdang ban ai jinghikai ïa baroh kiba nongïashim bynta haduh shiphew sngi, naduh ka 28 tarik jong u Nailar 2023 haduh ka 8 tarik Nailur 2023. Ka rynsan Miss Meghalaya kam dei tang shaphang ka rynïeng ryniot bad ka dur bhabriew; hynrei ka dei palat ïa ka jingbhabriew. Katba kaba ïohi nalor ka dei kum shi bynta jong ka jingïakhun ha kane ka rynsan ïakop ïaid thei bhabriew, hynrei ka kynthup ruh shaphang ka jingdon jong ki nongïashim bynta ïa ka jingstad, jingshaniah, ka jingpynkhring bad ka mynsiem sngew synei. Katei ka rynsan ka thmu ban batai bniah biang ïa ka jingitynnad ka durkhmat da kaba rakhe ïa ka jingdon sap bad ka jingkhlaiñ jong ki nongïashim bynta, da kaba pynlong ïa ki palat ban ïa ka jingïashim bynta jong ki ha kane ka rynsan ïakop thei bhabriew.
Ha kane ka jingïaid lynti jong ka jingïakop thei bhabriew, ki nongïashim bynta kin sa hap ïaid lyngba ki jingai jinghikai ïa ki kaba dei halor ka jingpyn leit jingmut ha ka maiñ jong ki, jingkren sha ki paidbah bad ka jingshaniah ha lade. Kane ka jingïashim bynta jong ki, kan sa ïarap ïa ki ba kin kiew ha ka jingim jong ki kum ki riew shimet hynrei kan sa ïarap ruh ïa ki ba kin ïashim bynta ha ka imlang ka sahlang kum ki kongsan. Katei ka rynsan ïakop thei bhabriew kan long kum u maw jam na ka bynta jong ki kynthei kiba thrang ban ïohrung ha ka pyrthei jong ka jingïaid model, ak phlim ne kren hakhmat jong ki paidbah. Kane ka rynsan kan sa pynlong ïa ki ba kin kiew kin san ha ka liang ka jingïoh jinghikai, ïar ka jingmut jingpyrkhat bad ban tbit ha kino kino ki kam ba ki trei, da kaba pynkhreh ïa ki na ka bynta ka lad kabu ksiar jong ka lawei ha ka karkhana pyni riam pyni beit bad ka karkhana ak phlim.
Shuh shuh, ka Miss Meghalaya and Miss Teen Meghalaya ka dei kawei na ki rynsan bakhraw ban pynhusiar shaphang ka jingdonkam ha ka liang ka imlang ka sahlang bad ka jinglong jingman hapoh ka imlang sahlang. Kitei ki nongïashim bynta kin sa don bynta ha ki kam jong ka imlang sahlang bad ha ki tamasa jong ka jingisynei ïa kiwei kum ka jingnoh synniang, da kaba noh mynsiem ban trei mon sngewbha, ha kaba kin sa long ruh kum ki nongrah ktien jong ka jingpynkylla ïa ka imlang ka sahlang kaba bha ha ki shnong kiba ki sah.
Da kaba long ki nongjop ha kane ka rynsan, ym tang ba ka wanrah ïa ka nam bad ka burom hynrei ka long kum ka lad lynti ban plie ïa ki ban ïoh ïashim bynta ha katei ka jingïa kop thei bhabriew. Ki nongjop kin ïoh ka lad ban mihkhmat na ka jylla ha ki rynsan ïakop thei bhabriew, ha kaba ki ïoh ban pyni ïa ka kolshor ba riewspah bad ba don sap halor katei ka rynsan bakhraw.
Ha ki snem ba la dep, ki nongjop jong ka Miss Meghalaya ki la dep mihkhmat na ka jylla bapher bapher ha ki bynta ba bun jong ki jingïaid ïakop thei bhabriew bad kiwei kiwei ki rynsan ïakop ïaid thei bhabriew shabar jong kanw ka jylla. Katba ka nongïoh rah ïa ka nam Miss Meghalaya, ka Miss Irene Dkhar, kaba ïohpdiang ïa ka pansngiat ha u 2022, ka la mihkhmat na ka jylla Meghalaya ha ka Miss Northeast 2022, ha kaba ka la long ka nongjop. Ka la shah jied ruh ïa ka nam kum ka Femina Miss India Meghalaya 2023 bad ka la leit mihkhmat na kane ka jylla halor katei ka rynsan bakhraw jong ka Femina Miss India 2023. Katba ka Miss Jessica Kharlukhi, kaba dei ka 1st Runner-Up Miss Meghalaya, ka la mihkhmat na kane ka jylla ha ka Miss Northeast 2022 bad ka la shah khot sngewbha bad bishar ha bun ki rynsan ïaid pyni riam bad ki rynsan ïakop thei bhabriew.
Ka Miss Teen Meghalaya jong ngi, ka Miss Daniella Shirley Majaw, ki dei kiba la dep ïohrah ïa ka nam ha ka bynta jong ka Miss Teen ha ka sien nyngkong bad ki la mihkhmat na ka bynta ka jylla ha ka Miss Teen Diva 2023, kaba la dep pynlong ha Jaipur, Rajasthan. Ki la pyndep ïa ka jinghikai na ka bynta katei jingïakop ïaid thei bhabriew ha kawei na ki skul ba pawnam ha India, ka ‘The Cocoberry,’ bad ka la shah jied ban ïaid halor ka rynsan bakhraw, ka ‘Lakme Fashion Week,’ lem bad ki khlur ak phlim ka Bollywood bad ki nongpynwandur ïa ki riam ki beit.
Ha ka jingïakren bad ki lad pathai khubor, la don lang ki dkhot jong ka Miss Meghalaya Organization, kynthup ïa u Bah Brian Wallang, ba dei u riewstad bad nongpynwandur ïa ki riam ki beit ba tbit bha bad ka Rochelle Wahlang, kaba dei ka nongseng kam lajong ba la dep ïohpdiang bun ki pansngiat ïakop ïaid thei bhabriew bad kum ka namjop ha ki por ba la leit, kynthup ïa ka nam Miss Meghalaya. Don ruh sa u president bad secretary jong ka Meghalaya Tourism Youth Development Society, u Bah Dominic Savio Diengdoh, Mr. Daniel Khongsit bad u Bah Shanbor Khonglah. EOM.
