JOWAI:
Ka Syntu Ksiar kaba pawnam bha, kaba long ka bynta jong ka wah Myntdu ha kaba u Kiang Nangbah u la ngam shapoh bad u la mih ryngkat ki tnad dieng sla kiba im, ban pynshisha ba u long u nongïalam ba U Blei u la jied bad ïaleh pyrshah ïa ka jingsynshar ki phareng ha Jaiñtia Hills.
U Kiang Nangbah, uba la tip kum u Khlawait ki Pnar bad u nongïalam ka Ri Khad-ar- dolloi jong ka hima Jaiñtia, u la shah jied kum u nongïalam ha ka jingïalang ba la pynlong ha Madan madiah kmai Blai ban ïaleh pyrshah ïa ka jingsynshar ki phareng. La kem bad la sdien phasi ïa u da ki phareng ha ka 30 tarik Nohprah 1862.
Kumta ka sorkar jong ka Ri India ka la pynbna ïa u kum uwei na ki nongïaleh laitluid bad la ju kynmaw ïa ka 30 tarik Nohprah kum ka sngi u Kiang Nangbah. La tei ïa u mot sah jingkynmaw ïa u Kiang Nangbah ha Madan madiah Kmai Blai, ka jaka ha kaba la pynlong nyngkong ïa ka jingïalang ban ïaleh ïa ki phareng.