SHILLONG:
Kaleh kmen leh sngewbha Shad Wangala balai sngi kynthih jong ka Garo, ia kiba la tip kum Achik ban ainguh ia u Blei, u Nongai Nongpynlong Misaljong yn pynkut noh mynta ka sngi. Ia ka Shad Wangala la tip ruh kum ka shad 100 ksing. Kane ka long ba ha kane ka leh kmen leh sngewbha la ju pyndonkam haduh 100 tylli ki ksing ha rynkat ka dih yiad um, kaba long shi bynta na ka jong leh leh niam jong ki Achik kiba dang bat ia ka niam tynrai. Ia ka Shad Wangala mynta ka kynti la pynlong noh ha A’dam, Chibragre ha West Garo Hills. La pyniphuh iphieng ia kane ka shad da kaba pynlong ruh ia ka die ka thied, ka jingpyni ia ki tiar ba shna hi da ki Achik na Lum Garo.
Shuwa ia kane,ha ka sngi sdangu Chief Executive Member (CEM), Garo Hills Autonomous District Council (GHADC), Tura u Albinush R Marak plie ia ka jingpyni ia ki tiar shna hi Handloom and Handicraft Exhibition. Ha kane ka sngi la don lang ruh u Linekar K Sangma GHADC Executive Member, Transport and Printing & Stationery, Nathwal S Marak, Executive Member, Civil Works, Winison Ch Marak, Chief Adviser to the CEM, Joint Secretary Peter R Marak, Chairman, Hundred Drums Wangala Festival Committee (HDWFC), Ronald Rikman Ch Sangma, ki dkhot jong ka Nokma Council bad kiwei ki kynrem ki lyndan jong ka Meghalaya.
Ki dkhot jong ka Committee, ki la iathuh ba ka Shad Wangala ka don ka jingiadei bad ka aiom ot kba, ia kaba la ioh pateng na ki longshuwa manshuwa bad kpa tymmen Achik jong ki. Ki la ong ruh ba kane ka leh kmen leh sngewbha, ka long ban pynneh ia la ka jong ka riti ka dustur. U Shongknor jong Hundred Drums Wangala Festival Committee, u Ronald Rikman Sangma u la pynpaw ia ka jingsngewnguh ia ka Sorkar jylla bad Sorkar India kiba la noh synniang pisa sha kane ka leh kmen leh sngewbha. U la iathuh ruh ba ia ka Shad Wangala la sdang naduh ka snem 1976 ha Asanang, kaba long ka Headquarters of Rongram Development Block.
U la iathuh ruh ba ki dkhot jong ka Nagaland Garo Tribal Council bad u President of Garo Students Union Nagaland Zone ki la wan bad ia shim bynta ha kane ka jingshad Wangala. U la iathuh ruh ba la don ka ruh ka jingialehkai tynrai Wa∙pong sika, Jakpong Pe∙a, An∙ding O’ka, Rongma Chilsusa∙a na ka bynta ki kynthei, bad Rongma Desusa∙a ia ki shynrang. Ia kane ka leh kmen la pyniphuh iphieng da ka jingiashim bynta ki samla pule jong ka North Eastern Hill University, Tura Campus.
Ha ka jingialehkai Tan Tyllai, ka kynhun Rongkhon ka la rah ia ka nam lahduh san sien kynthih. Ka Gondenggre ka la rah ia ka nam lahduh baar. Ia ki nongjop la ai da ki Trophy, ki Certificate bad pisa. Ha kitei ki lai sngi ba la pyllong ia ka Shad Wangala la pyllong ruh ia ki jingiakop rwai tynrai Rugala, Chachat So∙a, bad jingtem ksing.
