SHILLONG:
U President jong ka seng Voice of People Party (VPP) u Bah Ardent Miller Basaiawmoit, u la ong ba kane ka seng saiñpyrthei ka ba thymmai, kan pynïar ïa ka shnat jong ka sha Garo Hills ha kaba kan sei ïa ki kyrtong ban ïakhun na ka bynta ka elekshon 2023.
Haba ïakren bad u Kynjatshai, halor ka jingpynkhreh jong ka VPP ïa ka elekshon 2023 , u Bah Ardent u la ïathuh ba ka VPP ka la ïaid shakhmat ban pynkhreh ban aireng na ka bynta kane elekshon 2023.
‘Ngi la kynduh bad ki paidbah kylleng kylleng, ban pyntip ïa kaei ka daw ba la thaw ïa kane ka seng saiñpyrthei ba thymmai bad kiei ki nongrim jong ka, bad ka seng ka la ïaid shakhmat ban wad ïa ki kyrtong ki ba sngewthuh jingmut bad ki nongrim ki ba ngi don”, la ong u Bah Ardent.
U Bah Ardent u la kdew ruh ba ha man ki jaka ba ki nongïalam kane ka seng ki leit ban ïalap elekshon ka don ka jingpynpaw jong ki paidbah ïa ka jingthrang ïa ka jingkylla. “Kat sha ba leit ki briew ki ong ba kin phai sha kane ka seng saiñpyrthei kaba thymmai, hynrei ka ba sngewsih ka long halor ka jingbym lah ban sei ïa u kyrtong na baroh ki constituency”, u la ong.
“Ka long kaba suk ban ïoh ïa ki kyrtong hynrei ka long kaba eh ban sei ïa u kyrtong uba biang, uba sngewthuh, ïa ki nongrim jong kane ka seng saiñpyrthei bad kiba ka seng kan sngewthuh ba kita ki kyrtong ki long kiba biang ban tyrwa sha u paidbah”, u la bynrap.
U Bah Ardent u la ong “Ka don ka jingphylla halor kane ka elekshon 2023 namar nga la don ha ki sengsaiñ pyrthei kiba pher kum ka UDP ka HSPDP hynrei kaei ka ba nga shem haba nga leit sha u paidbah ka long ba u paidbah u kwah ïa ka jingkylla bad kwah ïa kane ka seng saiñpyrthei kaba thymmai”.
U la ong ba ka la don ka jingkhmih lynti ba ki paidbah kiba kwah ïa kane ka seng saiñpyrthei bathymmai bad kyrmen ba kin ai ka jingkyrshan khamtam na ka bynta kito ki Constituency, kiba la dep ban pynthikna ïa ki kyrtong, namar ba ki don ka jingthrang ban wan ka jingkylla halor ka shynshar ka khaddar.
U Bah Ardent u la ïathuh ba haduh mynta ka VPP ka la pynthikna ïa ki 14 -15 tylli ki kyrtong ki ban ïakhun na ka bynta ka elekshon 2023, kiba la pynkhreh bad kin dang don kiba tyrwa ba ki kwah ban ïakhun na ka VPP hynrei namar ba ka seng ka ïeng ha ka nongrim ka bym lah ban ïapeiñ ïa ki nongrim, kumta kam long ka ba suk ban ai tiket katba don kiba pan.
Halor ka Rilum Garo, u la ïathuh ba kumba ka long mynta ka VPP kan buh kyrtong ha Rilum Garo ruh. “Ka don kawei ka constituency kaba ngi la dep ban rai ban pynïeng kyrtong namar ba ka party kaba ïeng halor ka nongrim”, u la ong.
U Bah Ardent u la ong ruh ba namar ba ka dang dei ka seng saiñpyrthei ba thymmai ka dang don shibun ki jingduna, ki jingtlot, ha ka jingïaid lynti ban pynïaid ïa ka seng saiñpyrthei, khamtam halor ka jinglut jingsep kaba bun bym don ka spah ka phew, hynrei ba la kyrshan hi para maki.
“Ha ka VPP ki briew ki lah ban ithuh tang ïa u Bah Adelbert Nongrum u ba dei u MLA mynta bad ïa u Bah Ardent M Basaiawmoit namar ba nga dei u MLA barim hynrei lait nangta baroh ki kyrtong ki dei ki khmat ki ba thymmai hynrei ha Constituency jong ki, ki dei ki khmat ki kyrtong ki ba ki nongshong shnong ki ïa kren halor jong ki, na ka ta ka daw ngam ïohi kan don ka jingeh namar haba ngi sei ïa ki kyrtong, ki dei kiba biang ka jingnang jingstad kiba don ïa ka nam ba bha ki bym pat don ïa kano kano ka jingthohbria bad ki paidbah kin peit ïa kita”, u la ong.
U la ong kumba ka long ka Delhi, ïa ka APP la ithuh tang ïa u Arvin Kejriwal hynrei kaei kaba jia ka long ba wat ïa ki seng saiñpyrthei, kiba la suh thied bha, kiba la rim ki shah kyntait na u paidbah kumta ym lah ban ong ba dei tang maki ba lah ban thaw pyrthei hynrei ki nongrim kiba ïahap bad ka jingangnud ki paidbah kan wanrah jingjop namar ba ki nongshong shnong ki kwah ïa ka shynshar khaddar kaba khuid, ki la ïohi ïa ka jingbym itynnad ha kine ki san snem.
