SHILLONG:
U Chief Electoral Officer u Bah Frederick R Kharkongor, u la pyntip ba ka jingpoi ki paidbah ban thep ïa ka vote ban jied ïa ki nongmihkhmat na ka bynta ka ïingdorbar thawaiñ, kan kiew palat ïa ka 75% namar ba don na ki District ki ba ka jingthep vote kan kut haduh 9:00 baje janmiet jong ka 27 tarik namar ka jingthut ha ki kor thep vote bad na ka bynta ka jaka ba buh ïa ki EVM u la ïathuh ba la buh haduh 22 pyrton ki bor pahara.
Haba ïa kren bad ki ladpathai khubor ka u Bah F.R Kharkongor u la ïathuh haduh ka por 5 baje janmiet ki nongthep vote ki poi 75%, hynrei kane kan dang kiew namar ba don na ki katto katne ki District ki ba kynthup ïa ka East Jaiñtia Hills, Ri-Bhoi, South West Garo Hills bad ka West Garo Hills ki ba don 200 tylli ki jaka thep vote ki dang bteng haduh ka 9 baje mynta ka miet.
“Ïa ka kaiphot ka ba shai ka tnad kan sa lah ban pynbna lashai ka sngi hadien ba la ïoh lut ïa ki jingkheiñ ki ba pura na baroh 12 tylli ki District”, u la ong.
U la bynrap shuh shuh “Ka jingthep ïa ki vote ha baroh ka wei ka jylla ka la long ka ba ïaid beit ïaid ryntih bad ki don haduh 1830 tylli ki jaka thep vote ki ba hap hapoh ka Webcast”.
U la ïathuh, ha ka ba ïa dei bad ki 6 tylli ki jaka thep vote ki ba don ha Mawhati konstitwensi ki ba la kynnoh ba ki la shah khang ban thep vote, ki bor ba dei khmih ki la shimkhia bad ka jingthep vote ha kane ka jaka ka la long ka ba ïaid beit.
“Mynta ka sngi ka jingthep vote ka la long ha ki 3419 tylli ki jaka thep vote na ki 59 tylli ki konstitwensi, kane ka long hadien ba la pynsangeh shipor ïa ka jingthep vote ha Sohïong konstitwensi hadien ka jingkhlad kyndit u kyrtong ka UDP na kane ka konstitwensi bad ïa ka jingthep vote ha kane ka konstitwensi yn sa pynbna hadien ba la pynbeit da ka ECI” u la ong.
U la bynrap shuh shuh “95 % (11,310 ngut) ki nongthep vote ki dei ki briew ki ba don jingduna dkhot met bad 91.8 % (22,042 ngut) ki dei ki briew ki ba la kot ka rta sha ka 80 snem bad ïa ka ne la ailad ban thep vote na ïing”.
“Ki nongshonmg shnong ki ba la poi ban thep vote ki long 10.5 lak ngut ki rangbah bad 10.81 lak ngut ki dei ki longkmie, mynta ka kynti la ïohi ïa ka jingbun ki longkmie ki ba la mih shakhmat ban thep ïa ki vote jong ki, katba ki khynnah samla ki ba dang ïoh vote thymmai ki long 89,564 ngut bad ka tnad ka la pynkupburom ruh ïa ki hadien ba ki la dep thep ïa la ka vote.
“Mynta ka kynti ka jingñiew ïa ki vote kan long hadien ka 48 kynta kata ha ka 2 tarik u Lber ka ban sdang ha ka 8 baje mynstep bad kin don 13 tylli ki jaka ñiew vote ha baroh kawei ka jylla bad la buh ïa ki 22 pyrton ki ban pahara ïa ki Strong Room” la ong u Bah Kharkongor.
