SHILLONG:
Ka Election Commission jong ka ri India, ha ka 18 tarik Kyllalyngkot ka la pynbna ïa ka jingpynlong ïa ka jingjied ïa ki nongmihkhmat sha ka Ïing Dorbar Thawaiñ jong ka Meghalaya, Tripura bad Nagaland.
Kane ka jingpynlong ïa katei ka jingjied ïa ki nongmihkhmat ha Meghalaya bad Nagaland kan long ha ka 27 tarik Rymphang katba ha Tripura kan long ha ka 16 tarik u Rymphang, 2023. Ka jingñiew ïa ki Vote kan long ha ka 2 tarik u Lber, 2023.
Ki nongthep vote ha ka jylla Meghalaya mynta u snem ki don haduh 21,61,129 lak ngut baroh ha ki 60 tylli ki konstitwensi ha kaba 5 tylli ki dei ki konstitwensi ba la long kyllum (general) katba 55 tylli ki dei na bynta ki Schedule Tribe.
Na ki 21,61,129 lak ngut baroh, ki shynrang ki don 10, 68,801 ngut, ki kynthei pat ki don 10, 92, 326 ngut. Kiba don jingduna dkhot met ki don kumba 7,478 ngut. Ha kaba ïadei bad ka jingpynrung kyrteng kiba hapdeng 18-19 snem ki long 81, 443 ngut.
Ha kaba kaba ïadei bad ki jaka thep vote lane ki Polling Station ha u 2018 ki don kumba 3083 hynrei mynta pat ki la don haduh kumba 3482 ki jaka thep vote ha ka jylla baroh kawei.
U Chief Electoral Officer (CEO) ka jylla Meghalaya u Bah Frederick Roy Kharkongor ha kane ka sngi u la ong ba man la u kyrtong kiban ïakhun jied nongmihkhmat kim lah ban pynlut palat ïa ka T.28 lak.
U Bah Kharkongor u la ïathuh ïa kane ha ki lad pathai khubor ha Shillong, hadien ba ka Election Commission of India (ECI) jong ka Ri India ka la pynbna mynta ka sngi ba ka jingjied nongmihkhmat, sha ka ïing Dorbar Thawaiñ kan long ha ka 27 tarik u Rymphang mynta u snem.
U Bah Kharkongor u la ong ba mynshwa la shah ïa ki kyrtong ban rah pisa ym palat ïa ka T.20 lak hynrei mynta u snem pat la pynkiew shaduh ka T.28 lak ban pynlut ha kane ka jingïakhun elekshon.
U Bah Kharkongor u la ong ba ki nongshong shnong kin long kiba kham husiar ha kaba rah pisa haka por elekshon namar la shah tang hapoh 50 hajar tyngka. U la ong ba lada jia ba donkam eh bad bym lah ban kiar, ki nongrah pisa ki dei ban pyni ïa ki daw kiba biang bad ban pynshisha ruh ïa kata ka jingrah pisa ka jong ki, lada ki shah bat ha ki nongtrei elekshon.
Ha kawei pat ka liang u Bah Kharkongor u la ïathuh ba u la ïoh ban lum jingtip, ba ki don haduh 34 tylli ki konstitwensi ha baroh kawei ka jylla ha kaba ka jingtheh pisa ka jur bha bad na ka liang ka tnad elekshon kan nym ailad satia ïa ka jingpyndonkam bakla ïa ka pisa.
U la ong ba lada lap ïa kino kino kiba pyndonkam bakla ïa ka pisa yn sa pynshitom katkum ki kyndon jong ka aiñ. ïa kine ki konstitwensi kiba don jingma yn sa peitngor bha ym tang da ki Expenditure Monitoring Team hynrei da ki pulit ruh.
Ha kawei pat ka liang u Bah Kharkongor u la ïathuh ba ki briew kiba don ka jingduna dkhot met, ki riew tymmen kiba la 80 snem shaneng bad kumjuh kiba ïoh ïa ka jingpang Covid-19 kin sa ïoh ka lad ban thep Vote na la ïing ban leh ki briew ka tnad elekshon katkum ka Form-12D.
U Bah Kharkongor u la bynrap ruh da kaba ong ba ïa kito kiba 18 snem kiba dang shu ïoh ban thep Vote nyngkong yn ai buskit ïa ki bad kumjuh ïa kito kiba thep nyngkong ïa ka vote 1 hapoh 5 ki ruh kin ïoh ka buskit na ka tnad elekshon.
Shuh shuh u la ong ba ka tnad election kan pynlong ïa ka sngi ki nongthep vote lane ka National Voters Day ha ka 25 tarik mynta u bnai.
