SHILLONG:
U kyrtong ka Voice of the People’s Party (VPP) na North Shillong konstitwensi, u Bah Adelbert Nongrum, ha ka 9 tarik Rymphang u la leit ai FIR ha Sadar Police Station ha Shillong halor ka jingkynnoh pyndonkam bakla ïa ka pisa ba la mang da ka sorkar pdeng ïa ka Meghalaya kaba la thmu na ka bynta ka jingpynlut ha ka por jong ka khlam COVID-19.
Katkum ka FIR, u Bah Nongrum u la ong ba ha ka samoi pyrem jong ka jingtreikam ka ïing dorbar thawaiñ, u la buh jingkylli ha ka 12 tarik Nailur 2022 halor ka jingpynlut haduh kane ka tarik ha kaba ïadei bad ka COVID-19 ryngkat bad baroh ki jingpynlut na ka mang tyngka na sorkar pdeng.
Ka jubab ha kato ka por na u Myntri ka koit ka khiah ka long T. 76.56 klur.
Hynrei katkum ki jingtip ba la ïohlum na ka jingwad jingtip na ka RTI, ka pisa ba ka sorkar pdeng ka la pyllait ban ïarap lyngba ka National Health Mission hapoh ka India COVID-19 Emergency Response and Health Systems Preparedness Package for Meghalaya ka long T. 15.61 klur ha ka Phase I bad T. 104.12 klur ha ka Phase II.
“Kane ka lah ban long ka jingpyndonkam bakla ne ka jinglute ïa ka pisa ki paidbah, ki ba long ki jingpynkheiñ ïa ki aiñ hapoh ka Indian Penal Code (IPC),” la ong ka FIR.
Haba kren sha ki lad pathai khubor hadien ka jingai FIR, u Bah Nongrum u la ong ba um kynnoh ïa ka sorkar ne ïa uno uno u riew shimet hynrei, “kum u nongshong shnong ba don ka jingsngewkhia, u kwah ban tip shaei ka pisa ka jah”.
Ha u bnai ba la dep, u nongwad jingtip lyngba ki RTI, u Bah Disparsing Rani u la kynnoh ba ka sorkar jylla ka la pyndonkam bakla ïa ka pisa kaba la palat ïa ka T. 43 klur, kaba la mang da ka sorkar pdeng na ka bynta ban tehlakam ïa ka khlam COVID-19 ha ka jylla.
Ka khlam COVID ka la syllad ïa ka jylla mynba u Dr Aman Warr u dang trei kum u Director ka Health Service (DHS) jong ka sorkar jylla ha Meghalaya.
Ha kawei pat ka liang, u Bah Adelbert Nongrum un sa ïakhun pyrshah ïa u Dr Aman Warr, u ba dei u kyrtong ka United Democratic Party (UDP), bad kiwei ki kyrtong ha ka Elekshon 2023 na ka bynta ka shuki jong ka North Shillong konstitwensi.
