SHILLONG:
U myntri ka tnat ka koit ka khiah ka jylla Meghalaya,u bah James PK Sangma haba jubab ïaka jingkylli halor ka jingduh jingshaniah jong ki paidbah ïaka sorkar Meghalaya Democratic Alliance (MDA), u la ong katba dang jan ki sngi sha ka elekshon ki jingkynnoh ba laiphew jait ki don hynrei kadei tang ka jingkynnoh jong iwei bad arngut ki briew hynrei kiba bun kim kren kumta, ym dei ban ong baka dei na baroh.
U bah James u la ong, “Kaba bha tam ka dei haka por eleksjon namar ki paidbah ki thep vote bad kin ai ka jingsngew jong ki, laki pdiang ne kim pdiang ïaka jingleh ka sorkar, kata ka dei haka por elekshon bad hadien bala pynbna ïa ka resol mano ba jop, hangta kan sa kren dalade hi”.
Halor ka jingkynnoh jong ka liang pyrshah baka sorkar MDA ka pyndonkam bakla ïaka bor synshar, naka liang u bah James Sangma u la ong “Ki briew kiba im ha ki ïing ïit ki kawang maw sha ki ïing jong kiwei pat, ki nong ïalam ka liang pyrshah ki dei kiba la don haka bor synshar mynshuwa bad bun ki jingshah kynnoh ha kito ki por, maki ruh ki dei ban ai jubab, phewse ki bun kam ban kawang maw sha kiwei, ka jingleh ka jong ki ka dei kaba bakla”.
Haba ïadei bad ka jingkwah ban ïatai nia u Sakhet Gokhale, u nonglam ktien ka seng All India Trinamool Congress (AITC), u Sangma u la ong ba u myntri rangbah ka jylla u bah Conrad K Sangma u la kren halor kane da kaba u la ïaroh ïaki jingtyrwa u Gokhale hynrei u la ong ruh ba ka jing kob ïaki ka long kabym donkam.
“Ki nongthoh khubor ki dei ki nongbuh jingkylli bad kine arngut ki nong ïalam ka jylla kila ai ïaka jubab jong ki, te tang katta lah biang”, la ong u bah James . U la ong ruh, “Kumba long mynta nga kwah ban ong ba khlem da ïakhun elekshon tang shi sien ruh, hynrei ban shu tan ïaki MLA sha ka liang ka jong ki, ngam tharai kane kan long kaba dei ban ong baki dei ka sur jong u paidbah, ka dei ka elekshon kaban rai”
