SHILLONG:
Ka sorkar jylla ka la pyndam noh ïa ka jinglong dkhot baroh ha ka Women’s Commission hadien ba la shah ujor ba ki dkhot kila pynkheiñ ïa ka Model Code of Conduct (MCC).
Ka Congress ka la ujor sha u CEO ha kane ka sngi Baar pyrshah ïa ka Chairperson jong ka Women’s Commission ka Kong Phidalia Toi halor ka jingdon lang jongka ha ka jingïalap elekshon u kyrtong ka Jowai u bah Wailadmiki Shylla ka NPP bad kumjuh ka jingdon lang ka kong Felicita Majaw ka lok u kyrtong ka Congress na Mawlai u bah Marbud Dkhar kaba la synran lang ïa u ha ka sngi thep kyrteng namar ba ka dei ka dkhot jongka Commission.
Ka kong Phidalia ka la kam ba u kyrtong ka NPP na Jowai u dei u bakha jong u para jongka bad ka leit ban synran ha ka por ba thep kyrteng.
“Ngam shim bynta ha kano kano ka rally ne ïalap elekshon ïa u”, la ong ka kong Phidalia. Ka la ïoh pdiang shithi ban jubab halor kane hynrei kam pat ai ka jubab.
“Nga shu ïoh ïa ka hukum ba la pyndam ïa ka jinglong dkhot ka Commission”, ka la ong. Ka kong ka Felicita Majaw ka la ong ba ka la ïoh pdiang ïa ka hukum pynduh noh ïa ka jinglong dkhot kaba ïadei bad ka Commission.
“Nga dei tang ka dkhot mon sngewbha khlem shim tulop eiei. Ngam ïoh kano kano ka jingpan jubab”, ka la ong.
Ka Kong Felicita Majaw ka la synran lang ïa u lok ha ka por ba leit thep kyrteng. “Nga ai jingkren namar nga sngew ba ki kynthei kim ïoh ïa kano kano ka jingphai khmat kumba ka dei ban long ha ka synshar paidbah. Nalor kata, kam don kano kano ka jingteh kyndon kumta nga kren laitluid”, ka la ong.
