SHILLONG:
U General Secretary ka United Democratic Party (UDP) u Dr. Jemino Mawthoh u la ong ba ka jingsam pisa ha ka por elekshon ka ktah shi katdei eh.
U Dr.Jemino u la ong ba naduh ki por mynshwa haduh mynta la ïakren ïakhana ïa ka elekshon hapoh ki jingïalang bapher bapher ba ki paidbah ki dei ban husiar na ka jingpynbeij pisa tang ha ka por elekshon namar ka kam synshar khadar ka dei ka kam bah kam san, ka dei ka kam ban saiñdur ïa ka lawei bad kam dei ka kam ban shu ïalehkai ban shu thied ïa ki briew.
“Ka pisa kan pynjot pynswai ïa ka lawei kum ka jylla hi baroh kawei namar lada beij tang ïa ka pisa ha ka por elekshon bad ynda la dep ka elekshon ka long kumno?”, u la ong. “Ki jingiarap tang ha ka por elekshon, ai pisa baiskul ai pisa baikot, ai pisa bai piknik ter ter. Nga buh ka jingkylli ai pisa baiskul tang shisien ha ka san snem seh. Balei ym ai baiskul ym ai pisa man ka snem balei tang ha ka shisien san snem”, u la bynrap.
U la ong ba ki don ki nongialam ki ïarap ïa kiba duk T.500 T.1000 hynrei ka jingkylli ka long lada kine ki nongialam ki ong ba ïarap ïa kiba duk, te balei kiba duk ki duk sah kat dang mih u snem ki dang bun ki Below Poverty Line (BPL). Lada ong ban ïarap ïa kiba duk kyntiew ïa rukom im jong ki ym dei kato ka pisa ba ai tang ha ka por elekshon.
Ha kaba ïadei bad ka jingpynkhreh jong u ha kane ka elekshon 2023, u Bah Jemino u la ïathuh ba u la don bynta ha kam kam imlang sahlang hynrei da ka jingïakhun jong u ha kane ka rynsan jong ka saiñ pyrthei un dang lah ban leh khambun namar ki MLA ki dei ki nongthaw aiñ, ki lah ban leh shibun ki kam.
Ha kaba ïadei bad ka jingrem jong u ha ka elekshon ba la dep, u Bah Jemino u la ong ba ka jingrem ha u 2018 ka dei tang khyndiat bad ha kane ka elekshon kaba mynta ka long kam pher khyndiat. “2013 haduh 2018 ngi don ha ka liang pyrshah, ngim im tyrkhong 5 snem”, u la ong.
U la ong, “Hadien u 2018 ng ïohi ka don ka jingkylla namar kiba bun ki nongialam na ki party bapher bapher ki snohkti ban pyniasoh sha ka party UDP bad gi khmih lynti ruh ba ki paidbah kin phai sha kane ka party”.
U la ong ba bun ki noh sha kane ka party UDP bad u kyrmen ba ha kine ki snem ban wan ka UDP kan lah ban leh kham bha ban pynwandur ban pynïatylli ïa ki paidbah ha ka lynti kaba dei.
Haba kylli hato ka lah ban ktah ïa ka Vote namar u Bah Charles Pyngrope u mih na ka Congress ban ïasoh sha ka TMC, u Bah Jemino u la ong, “Hooid kan don hi ka jingktah namar ba ka party kaba thymmai. Kumba ong uwei u nongialam ka party kito ki mih na ka seng UDP kidei kiba shet kylla bad kito kiba rung sha ka UDP kidei kiba kylla kabamut. Lada ki nnogialam bapher bapher ki don ka jingsngewthuh ban ïadonlang ban ïasaiñdur biang ïa ka synshar ka khadar ha ka jylla”.
U Bah Jemino u la ong ba kham niar ban ïoh ïa ka sorkar ba synshar marwei namar bunsien hi ka jingsynshar ka dei beit ka khleh khawlang. U la ong ba kum ki kynhun ba ïadonlang dei ban pyrkhat wat lada don ha ka sorkar khleh khawlang kaei kaba dei ban leh na ka bynta ka jylla, kaei kaba dei ban leh na ka bynta u paidbah.
