SHILLONG:
Ki sngi sha ka jingjied ïa ki nongmihkhmat ka la nang jan na kawei ka sngi sha ka wei pat, ki kyrtong kiba mih ban ïakhun ïa kane ka ilekshon sha ka ïingdorbar thawaiñ kila bun kam ban leit pynshai paidbah na kawei ka shnong sha kawei pat.
U Kyrtong ka seng Congress na Mairang konstitwensi u Bah Batskhem Ryntathiang haba kren ha ka jingïalang ha Tirot Sing Memorial Hall Pyndenumiong Mairang, u la ong, “ngin ym lah ban pynlong ïa ki rally namar ngim don pisa ban khawai hynrei tang kawei sngew skhem ha la ka jong ka nongrim, ngim dei ban leh kumba leh kiwei pat, lashai la shi sngi haba pynlong rally kiwei kam eh ban pynmih briew, hynrei kaei kaba donkam ka dei ban skhem.”
“Kum u nongïalam nga pyrshang ban pyndep hok ïa la ka kamram, kin don kiba ong ba u Bahbah u la thok hynrei to kynmaw ba ka jinglong MDC ka dang sah sa shi snem,” u la ong.
U la bynrap da kaba ong, “Sa pyrkhat ma phi mynta ki briew ki pynpaw ba ki kwah ïa ka jingkylla, lada jop ma nga bad lada ki skhim kim long shai bad nga burom tang ïa kiba don kyrdan, phi ki paidbah phin ïa kynduh jingeh ngam kwah ban ngan leh kumta.”
U Bah Batskhem u la kyntu ruh ïa ki paidbah ban trei shitom namar kum ki nongïalam ki kwah ban jop bad kiwei ruh kiba ïaleh ki kwah ban jop, shim ïa kane ka jingïalang tang kum u rnga u ba ngi la pynrhem bad ban trei shitom ban rah ïa ka thong ka jingjop.
“Phi wan hangne namar phi kwah ïa ka jingkylla, lada jop ma nga baroh ka skhim kan leit sha ki paidbah, kam dei ban long ba ka skhim kan leit tang sha kita kiba don kyrdan ne kiba kyrshan hynrei ka dei ban long na ka bynta baroh ki paidbah,” u la ong.
U la bynrap ruh da kaba ong, “Ban im ka ri bad ka jaitbynriew, ngim lah ban kynnoh ïa ki paidbah, ka dei ïa ki nongïalam ban kylla, ka dei ïa ki nongïalam shuwa ban kylla ba ka jingkhmih lynti jong ki paidbah kan sa urlong. Lada ki nongïalam ki pynbiej tang ha ka por ilekshon shano ka lawei jong ki paidbah kan poi.”
U Bah Batskhem u la pynshai ruh ba lada ka skhim MDC bad ka skhim MLA ki pyntrei hok katno ka jingkylla kan wan, la ka dei ïa ki surok ne ki Skul bad ki wei kiwei.
“Lada jot ka surok hangne ha Mairang shi snem ar snem ngi la pynbha, sha nongkyndong pat 10 snem ruh phin ym ïoh. Kum u nongïalam nga la pyrshang ba ki kam pynroi kim dei ban noh shiliang, kaba donkam ka dei ban pyndep hok ïa ka kamram khlem shah shiliang,” ong u Bah Batskhem.
U la bynrap ruh da kaba ong, “Ki don ki shnong kiba 20 ïing, kiba 30 ïing nga ai ka skhim kaba 3 lak, phi kyrshan ne phim kyrshan ngam tip ïa kaei kaba nga dei ban leh nga leh beit, namar ha nga ka jingjop kaba khraw eh kum ki nongïalam kam dei ka jingjop ilekhson hynrei ka jingjop ba khraw ka long ka jinglong, ka jinglah ban synshar khlem leh shiliang bad ban pyndep hok ïa la ka kamram.”
Shuh shuh u la ong kaba kham kongsan kaba phi jied ïa ngi ka dei ban ïasaid halor ki mat kiba bun jong ka jaitbynriew, lada kum ki nongïalam lada ka ktien da kum wei bad ka kam da kum wei ngin shu leh mynleh, ngin ym lah ban ïeng.
Na ka liang ka Dr. Bibilynda Wahlang haba kren ha kane ka jingïalang kala ther tyngeh ïa kito ki briew kiba ong ba ki shymphriah kti jong ka Congress ki la kdiah, namar bun ki la phet sha ka seng UDP, na ka liang ka Dr Wahlang ka la ong, “Ym dei tang ki khabah kiba don shymphriah kti, hynrei ki kha rit ruh ki don kumjuh.”
Ka Dr Wahlang ka la bynrap ruh da kaba ong, “Ka saiñ hima ha ka jylla ka la kylla long kum ka kam business.”
Ka la kyntu ruh ïa ki paidbah ban ym shah set mraw ha kito kiba pynbiang da ka pisa, wat die tad ïa la ka jong ka longrynïeng tang ha ka por ilekshon.
Ha kane ka jingïalang da ki hajar ngut ki nongkyrshan ka Seng Congress ki la wan ban sakhi lang bad ban ai mynsiem ïa u kyrtong ban poi sha ka thong jong ka jingjop.
