SHILLONG:
U myntri ka Sorkar Meghalaya Democratic Alliance (MDA) Bah Paul Lyngdoh u la ong ba ym da ka jingpynkhih win ïa ki paidbah ka ba lah ban pynbeit ïa kano kano ka jingeh ha ka jylla hynrei da ka bor bad ka iktiar ka ba u paidbah u la pynkup ki lah ban pynbeit ïa kano kano ka jingeh.
Haba kren halor kane ka bynta u Bah Paul u la kdew ïa ka wei ka jingjia ka ba ïadei bad ka MUDA, da ka ba ong, “U la don teng u wei u nongïalam u ba la ïalam, ïa ki paidbah na ka bynta ban pynkylla noh ïa ki By-law ka MUDA, ban pynkhlaiñ noh ïa ki dorbar shnong ïa ka bor ba bat da ka MUDA ai noh sha ka District Council bad ka lynti ka ba u jied ka long ban ïalam ïa ki paidbah ban ïa mih, ïa mareh, ïa kawang maw ïa ki pulit, ïa ki media, kaei ka ba mih nangta lait tang ka snam jong ki briew”.
“Hynrei halor kane ka juh ka mat, nga la leit kum u EM incharge ka Building Bylaw ryngkat u CEM ka KHADC u Bah Titosstarwell Chyne ban ïakynduh ïa u Minister Incharge u Bah Sniawbhalang Dhar, ngi khlem rah maw khlem rah jri, ngi khlem kawang ïano ïano, ngi la ïakren ha ka jingïalang ba la long ar sien ha ka jingïadon lang u advocate general, ki la kubur ba ki don ki jaka ban donkam ban ai noh sha District Council, bad hadien kane ki la rai ban pynkylla ruh ïa Meghalaya by-laws bad ka thaw ïa ka Building Regulatory Authority, ka ba pynlong ba wat ban thaw ïa ka ïingdorbar thymmai ruh ki hap ban shim jingbit na ka District Council mynta”, u la bynrap.
U la ong shuh shuh, “Na ka liang u Myntri ka tnad Urban Affair, u la thaw da ka thup kyrteng ki jaka ban ai pynïaid ka District Council ka ba kynthup ïa ki 6 tylli ki jaka, ki ba ju peit da ka MUDA, bad la ai noh sha ka Council lyngba ka iktiar kum ki nongthawaiñ, ngim shem leit ban lympat ne kyrdem ïa ka miej u myntri, hynrei da ka jingjaijai ka kam ka la urlong bad ka juh ka kam ka ba la lum paidbah haduh 2 lak ngut ha Polo khlem lah ban pynurlong ïa ka”.
U Bah Paul u la ong ruh, “Haba phi long kum u nongïalam, phi dei ban pyni ïa ka da ka jingshlur, ka sorkar u Dr Mukul Sangma, ka la wanrah ïa ka Bill ki ba kren shaphang ki dual post ban long MLA bad MDC ha ka juh ka por, bad don uwei u ba la resign nyngkong duh tang da ki kynta hadien ba la rah ïa kane ka Bill hapoh ka ïingdorbar thawaiñ”.
“Une u hero u ba la resign nyngkong duh, katba ka dorbar kam pat kut, ka shithi iehnoh kam u MDC ka la poi ha miej u Dr Mukul Sangma, katno ngut ki ba ai burom ïa une u MLA, MDC u ba ïakhun ïai neh bad poi shaduh High Court ban pyrshah ïa kane ka bill ba wanrah u Mukul Sangma bad ïoh ruh ïa ka jingjop, u la jop namar ba ka ïingbishar ka la pynskhem ba kane ka kam MDC kam dei ka ban ïoh jingmyntoi bad u ta u dei u Bah PN Syiem”, u la bynrap shuh shuh.
U Bah Paul u la ong, “Ai ngin ai burom ïa ki ba dei ban ïoh burom, phi kren ïa kano ka kam kaba ngam shem la leh, la ka dei ha ka trade laisen kaei ka ba nga la dep ban leh, ki minister ha kato ka por ki poi sha District Council namar ba ka ktah ïa ki nongthep vote jong ki, hynrei nga ong em ïa ngi namar nga ju treikam kum ba nga la bam smai, ngan trei khlem ka jingtieng, ka jingleh shiliang, khlem ka jingmut sniew ïano ïano ruh bad ngi trei kam da ka ta, kam dei tang ban ïoh jingmyntoi ïa lade ha ka kam saiñpyrthei”.
“Halor ka mat Reservation Policy, ka jingshah kynthoh jong nga, marwei ka long namar ba ka thaiñ motphran ba kadei ka jaka ba ju don ka jingïakhih na ki lai tylli Constituency kata ka Mawkhar-Jaiaw, Mawlai bad Mawprem, ïa ka Mawkhar bad Mawlai ka VPP ka la jop bad ka bym lah ban jop ka dei Mawprem kumta ki kynthoh ïa kane namar kim lah ban ïoh jingjop na kane ka thaiñ”, u la bynrap shuh shuh.
U Bah Paul u la kdew shuh shuh, “Kan kham eh ban kren bad ban leh eiei na ka bynta ka jaitbynriew nangne na Mawpren ban na Nongkrem, na Nongkren phi lah ban kren kop katno katno ruh kam don jingthud, hynrei lada phi kren tang na ka bynta ka trading laisen, na kine ki thaiñ, ki la thud lut ki nongthep vote hynrei nga khlem kynran dien bad nga la leh ïa kata ruh hynrei haba phi kren tang na Nongkrem, kyrhuh katba mon kan leh aïu haba hato don ki Khasi suda”.
“Ki briew ki ba wan ban pynpaw ïa ka jingpyrshah hangne, kumno kin pyrshah ha ba u kyrtong jong ki u long basaw ha ka election, ha ba phi long basaw ha ka election pdiang ïa kata bad ki paidbah ki la jied ïa u Bah Paul Lyngdoh, ym ba u thung hi ïa lade da lade, hynrei ki wanrah placard hangne ki la dei ban rah bad ap haduh 2028 keiñ ynda ki la pynjop u Prah”, u la ong.
U la bynrap shuh shuh, “Ka jingieid jaitbynriew, kam dei ka nongkynti jongno jongno ruh bad don bun ki briew, kim ju kren kim ku pynpaw ba ki ieid jaitbynriew hynrei ki leh bun ki kam na ka bynta ka jaitbynriew, ki wad jingtip bniah halor ka jaitbynriew Khasi, ki pynlut ka spah ka phew ban thoh ban lum ban lang kita, ki dang kham ieit jaitbynriew bun maki”.
“Nga ju soi bun ki file, na ka bynta ka jingmyntoi ïa ka jaitbynriew bad ïa ka jylla jong ngi, hynrei ngam ju kwah ban kiew sha tnum ka secretariat ban pynbna paidbah ba nga la dep leh ïa kane ka kam, namar kam dei kumta hynrei ha ka kam paidbah ngin trei kum ki rangbah, ki ba la dep ban ai ïa ngi, ka jingkitkhlieh”, u la ong shuh shuh.
