NONGPOH:
U Bah Denis Mukhim, uba la dei uwei na ki briew ba paw ha ka thaiñ Mawhati bad ba ki paidbah ki la tip ïa u kum u Bah Mode, ha ka 23 tarik Kyllalyngkot u la pynbna paidbah ïalade ba u la leit ban pynïasoh noh ïalade sha ka seng Congress bad ban ai jingkyrshan ïa u Bah Charles Marngar, Kyrtong ka Congress na Mawhati konstitwensi ha kane ka Ilekshon 2023.
Lah ruh ban kdew hangne, ba ha katei ka sngi ba u Bah Denis Mukhim bad ki nongbud jong u, kiba la rung noh sha ka Congress, ki dei ruh kiba don hapoh jong kawei ka kynhun kaba la tip kum ka Mawhati konstitwensi People’s Forum (MCPF) bad ha katei ka sngi kaba ma u lem bad ki nongbud, ki la rung sha ka Congress, la wan ban pdiang sngewbha da u Ma Vincent H. Pala, President ka MPCC, u Bah Charles Marngar, Kyrtong ka Congress na Mawhati lem bad kiwei.
Ka long ruh ka jingshisha, ba u Bah Denis Mukhim, u la dei uwei na ki riew rangbah uba la thmu ban aireng ha kane ka Ilekshon 2023 na Mawhati konstitwensi, ha kaba u la thmu ban ïakhun na ka seng UDP, hynrei namar ba um ïoh Ticket na ka UDP, u khlem mih madan shuh ban aireng, hynrei tad haduh kane ka sngi, u la pynbna syndon ïalade ba un kyrshan noh ïa u Bah Charles Marngar, uba dei u kyrtong ka Congress.
Ha katei ka sngi, ba u Bah Denis Mukhim u la rung sha katei ka seng, la ïohi ba ki la don da ki hajar ngut ki nongbud jong u bad kiba don hapoh ka kynhun kaba la tip kum ka MCPF, ki la rai ban rung noh sha ka Congress bad ban kyrshan noh ïa u Bah Charles Marngar.
Haba ïadei bad katei ka jingwan pynïasoh u Bah Denis Mukhim sha ka Congress, na ka liang u Ma Vincent H. Pala, kumjuh ruh u Bah Charles Marngar, ki la pynpaw ïa ka jingkmen kaba khraw bad kiba la pynpaw ïa ka jingkyrmen kaba khraw, ba u Kyrtong ka Congress ba un poi sha ka thong jong ka jingjop ha kane ka ilekshon na Mawhati konstitwensi.
