SHILLONG:
U President ka Bharatiya Janata Party (BJP) Meghalaya ba dei ruh u kyrtong ka seng na West Shillong konstitwensi, u Bah Ernest Mawrie, ha ka 6 tarik Rymphang u la thep kyrteng ban ïakhun ïa ka elekshon ka ban sa long ha ka 27 tarik Rymphang 2023.
La ïasynran lang ïa u Bah Mawrie da u Myntri ka sorkar pdeng ka tnat Earth Sciences, Govt. of India, u Jitendra Singh.
Na ka liang u Bah Ernest Mawrie u la ai ka jingkhublei ïaka seng BJP ba ka la ailad ïa u ban ïakhun na West Shillong konstitwensi bad ïa u Dr. Jitendra Singh u ba la wan ban synran khnang ïa u kum u president jong ka seng ha kane ka sngi thep kyrteng. U la ai khublei ruh ïa baroh ki nongkyrshan ki ba la synran lang ïa u ha katei ka sngi.
Haba kren sha ki lad pathai khubor, u Bah Mawrie u la ong u la shem ba hadien ba u la treikam bad ïaid ha katei ka konstitwensi, u la ïohi ba don shibun ki jingduna ha kaba na ka liang ka jong u, u la kynduh ïa iwei pa iwei ki paidbah, u la rung ha ki thliew ïing, kumta u la ïohi lut ïa ki jingdonkam bad jingduna jong katei ka konstitwensi bad hadien ba u la rai ban ïakhun na katei ka konstitwensi u la ong ba u don shibun ki jingthmu ki ba u la buh bad lada ki paidbah ki i bit ïa u, u don shibun kiei kiei ban leh na bynta ki paidbah.
Shuh shuh u Bah Mawrie u la ong, “Kumba ngi tip ba kine ki jaka ngi tip ba ki bun bha kine ki drug maniac, ki ba na ka liang jong ka party ngi la ïeng bad ngi pyrshah ïa kane ym dei ba ngi pyrshah ïa kita ki nongdih droks, hynrei ngi kwah ban pynduh jait ïa kane khnang ba kan nym don shuh ka jingdie bad ka jingdih droks ha kane ka jaka. Kumba long ka BJP naduh na centre, u Amit Shah u la wan hapoh Guwahati, haduh 40 hajar metic tons lah crash ïa kita ki droks ba la ïoh kem da ki police bad da ki narcotics bad kumta ter ter”
U Bah Mawrie u la ong ruh, ba u la ïohi mynta ba ki nognshong shnong jong ka 18 West Shillong konstitwensi ki kwah ban ïohi ka jingkylla, ki paidbah ki la phai khmat sha baroh bad ki la ailad hynrei ha kane ka kynti u khmih lynti ba ki paidbah kin ailad ïa u ban pynjop na ka BJP.
“Lada ngi kwah ban wanrah shisha ïa kata ka jingkylla ha baroh ki bynta, naduh ki surok, ki medical college, engineering college lane ban wanrah ban pynbeit ïa kata ka jingkyrduh kam, ngin hap ban phaikhmat tang sha ka seng BJP”, u la bynrap.
Haba kren halor ka Inner Line Permit (ILP), u Bah Mawrie u la ong, “Halor ka ILP ki MLA na ka party hapoh ka Assembly ki la kyrshan lang, ki la kyrshan ïa ka resolution bad ki la wan lang bad ka Khasi Authors Society shapoh ka nongbah Delhi ban pynrung ïa ka ktien ka jong ngi hapoh ka 8th schedule, bad na ka liang ka jong ngi, ngi la ïakren bad kan dei ruh kawei na ka mat ha ka manifesto ka jong ngi”
Haba kren halor ka RSS, u Bah Mawrie u la ong, “ka RSS ka dei ka organization kaba don la ka jong ka bynta, kum ka party ngi don la ka jong ka bynta ban ïada la ïa ka jaitbynriew ne ïa ka niam bad ka constitution jong ngi ka clear, ngi ïeng ha ka secularism bad ka democracy”.
