SHILLONG:
U MLA ka Pynthorumkhrah u Bah Alexander L Hek u la ther ïa ka sorkar lajong, ka Meghalaya Democratic Alliance (MDA) halor ka jingjia ha Mukroh, West Jaiñtia Hills. Haba kren mynta ka sngi, u Bah Hek u la ong ba lada ïa ka mokutduma kaba la rejister sha ka jylla Meghalaya, dang hap ban donkam ïa ka jingtohkit CBI na ka sorkar pdeng, ka pynpaw ïa ka jingbym ler kam ka Sorkar jylla bad donkam ban pynjari da ka President Rule ha ka jylla.
U la ong ba ka jingjia ha ka shnong Mukroh, la ka dei ka jingbakla jongno jongno ruh hynrei kim dei ban siat pathar bad lada ki leh bakla dei ban kem ym ban siat pathar.
“Ka jingpynïap ïa kine ki nongshong shnong ha ka jylla ka la wanrah ïa ka jingbym shong suk ha ka jylla bad nga pynrem jur halor kane ka jingleh jong ki”u la bynrap.
U Bah Hek u la ong ruh “ha ka jingsngewthuh jong nga, ka aiñ jong ka jylla ka don ban peit halor kane bad lada ki sngew ba kine kim lah shuh hap ai CBI te la dei ban ai shynshar noh da ka President Rule ha ka jylla ruh”.
“Kata ka dei ka jingshisha ba lada don kano kano ka jingjia ha kano kano ka jylla, ka dei ka kamram jong kato ka jylla ban wad ïa kiba leh ïa ki kam sniew bad kane ka dei ka jingjia kaba la jia ha ka jylla jong ngi, kane dei ban tohkit da ki pulit ha ka jylla lada ap ban da leh ka CBI balei kim ai CBI ïa ki ba bun ki jingjia ha ka jylla”, u la bynrap.
U Bah Hek u la ong ruh ba ka jingbitar halor kane ka jingjia. “Nga ruh nga bitar bad sngewsih bha ïa kane ka jingjia bad nga phah ka jingsngewlem halor kane ka jingjia ,hynrei nga kyrpad ïa ki samla lada ngi leh pyrshah ïa ka sorkar ne pulit wat pynthud ïa ki paidbah, ka jingleh uwei arngut ngim lah ban wanrah ïa ka jingeh u paidbah bad ngim lah ban khang ïa ki kali na Assam”, u la ong.
U la ong ba baroh ki bam ki dih, ka petrol ki wan na Assam bad ka jingïaleh ka long pyrshah ïa ka sorkar bad u la dawa ba dei ban kem mardor ïa ki ba donkti ban pynïap ïa ki nongshnong shnong ha ka jylla bad ruh ban ai kam sorkar ïa kiba haïing jong ki.
Halor ka jingkhang jong ka sorkar Assam ïa ki briew ban wan sha ka jylla, u la ong, “ka jingkhang jong ka, ka dei ka bym shong nongrim, dei ban tip kumno ban pynneh ïa ka suk ka saiñ hapdeng kine ki ar jylla bad Guwahati, ka dei ka jingkhang sha ka jylla jong ngi bad ngim lah ban shu khang ïa ki namar ki nongpang ruh na ka jylla mynta ki don hapdeng ka jingeh” .
U Bah Hek u la ong ruh ba ka jingkhang ïa ka internet khamtam mynta ka dei ka por eksam ha baroh ki skul ka la pynthud bad khang ïa ki khynnah pule.
“Balei kin tieng ïa kane ban pynsaphriang baroh hi ki la tip halor kane ka jingjia bad haba ïadei bad ka internet kan dei ka jingduh ka ba khraw ïa ki khynnah skul”, u la ong.
