SHILLONG:
Ki nongïalam ka HSPDP na ki shnong bapher bapher ka Mawkynrew konstitwensi kila ïalum khrui ha ka sngi Balang ha shnong Jongksha ban pyni sha ka pyrthei ba ka jingpyn-saphriang jong kiwei ïa ka lyer, ba u Bah Martle N Mukhim um don lyer shuh ha ki shnong bapher bapher.
Ki nongïalam ka HSPDP na ki shnong bapher bapher kila wan khnang sha kane ka jingïalang ban pyni durkhmat ban pynpaw ba ka khubor bymdon lyer bymdon nongkyrshan ka dei kaba shu lamler jong kito ki briew kiba kwah pynïalam bakla ïa ki paidbah. Kawei pat ka daw pyllait jynhaw jongki, ka long ba ki la ong ba u Bah Martle N Mukhim ula tymmen namar ba kim don da kiwei ki daw.
“Ki ai daw ïa u Bah Martle N Mukhim ba la tymmen hynrei kat nang tymmen kat nang sat, kum u sohmynken katba nang ïaw kat nang sat”, la ong uwei u riew rangbah na thaiñ Mawkynrew.
U la bynrap, “Ngin ïakhun tyngeh ïa u tymmen jong ngi bymdon khun, uba kham sngewthuh kham tip, kham nang. Wat bakla ïoh kan hiar ka jaitbynriew sha ktieh”.
Ha kane ka sngi la jied bad pynskhem ruh ïa ki nongkitkam ka HSPDP Mawkynrew hapoh ka jingïalam u Bah Martle N Mukhim kum u President nalor kiwei pat ki nongkitkam bad la pynbam smai ïa u President ka HSPDP Youth Wing u Bah Sandondor Ryntathiang. La pynskhem ruh ïa ka tnat ki samla bad ki longkmie ha kane ka sngi.
