SHILLONG:
U MDC ka seng Congress ka Mylliem konstitwensi u Bah Ronnie V. Lyngdoh u la ong ba ka ka Ïingbishar ka hap ban tuklar ha kiba bun ki khep namar ba ka sorkar kam ler.
U Bah Ronnie u la ong ba ka jingsahdien ym tang ha Mylliem konstitwensi hynrei ha baroh kawei ka jylla ka pynlong ïa ka Iingbishar ba ka la hap ban tuklar ha kaba ïadei bad ka jingpyntreikam ïa ki kam pynroi jong ka sorkar jylla.
Haba ïakren bad ki katto katne ki nongthoh khubor u Bah Ronnie u la ong, “Nga dang ïohi ka kot khubor mynne ba ka Ïingbishar ka la pynmih ka hukum ïa ka sorkar jylla, ïa ka tnad PWD bad ka NHAI ban pynbha lane ban maramot noh ïa ka surok Shillong-Jowai”.
U la ong ba ym dei tang hangne ha konstitwensi ka dang sahdien hynrei baroh kawei ka jylla. U la ong ba kane ka sorkar Meghalaya Democratic Alliance (MDA) ba ka la pheil lut ha baroh ki liang khamtam ha ka kam pynroi.
