SHILLONG:
U Deputy Chief Executive Member ka KHADC, u Bah Pynshngain N Syiem myn ha ka sngi balang u la pyntip ba ka border committee ba la pynïaid da ka Council ka dang don ha ka jingïakren bad ka regional committee na ka bynta ban ïakren ïasuk halor ka jingïakajia bad ka khappud Assam.
Haba la jubab ïa ka jingkylli kaba la kylli da u Myntri ka liang pyrshah, u Bah Titosstarwell Chyne, u Syiem u la pyntip ba tad haduh mynta ki regional committee jong ka Meghalaya bad Assam kim pat leit jngoh ïa kito k jaka ïa kajia na ki daw bym lah kiar.
Katba u Chyne u kwah ban tip ba ka jingmih na kane ka jingïalang kaba ka pynlong hapdeng ka Meghalaya bad Assam naduh ba la don ki dkhot jong ka House kiba long ruh ki dkhot jong ka regional committees, ha kaba u Syiem u la pyntip kumne, “Ka jingïalang hapdeng jong ki chairman jong ki regional committee jong ka jylla Meghalaya bad Assam bad ym don jingïakren eiei ruh em halor ba kumno ban pynkhreh ha kaba ïadei bad ka jaka kaba ngi la dep leit jnogoh hynrei ha ka jingïalang, ïa ka tarik, ym pat pynthikna na ka bynta ka jingleit jngoh ïa ka jaka”.
