SHILLONG:
Ka seng Congress ka la pynrem ïa ka jingpyni bor ïa u MLA barim ka Gambegre u Saleng Sangma bad dawa ruh ban ai ka jingïada pulit. U Saleng un ïakhun kum u kyrtong ka Congress na Gambegre konstitwensi.
Ha ka kyrwoh ba la pyllait ka seng Congress ka la dawa ïa ki bor sorkar ba pyni lada ki don ka Video ha ka por ba beh lane pynsangeh ïa kane ka kali jong u Saleng.
Lah ban kdew ba katkum ka jingkynnoh na ka liang ki pulit, la ong ba u Saleng um treh ban sangeh ha ka por ba pyllong ka jingkhynra ïa ki kali hynrei hadien ka jingbeh u la sangeh bad ha ka por ba khynra ïa ka kali jong u, ym shym la lap ei ei. Shuh shuh la pynngat kyndon ain pyrshah ïa u hynrei hadien kata la weng noh ïa jingpynngat ain ïa u.
Na ka liang ka seng Congress ka la dawa na ka sorkar jylla kumjuh na ka tnad Election ban ai ka jingïada pulit na ka ïa kane ka jingma ka jingim jong u.
Ha kawei ka liang ka seng Congress ka la pynrem jur ïa ka seng Bhartiya Janata Party (BJP) halor ka jingleh politik lyngba ka Janajati Dharma Sanskriti Suraksha Manch ba donkti da ka seng RSS nadien ban dawa ban weng noh ïa ka jingithuh ïa ki Scheduled Tribe (ST) khamtam ki paid Khristan.
“Kane ka jingleh ka long pyrshah ïa ki kynhun ritpaid kiba hap ha ka Scheduled Tribe (ST) jong ka thaiñ shatei lam mihngi khamtam ki paid kynhun Khristan hapoh ka jylla Meghalaya bad Nagaland”, la ong ka seng Congress.
Shuh shuh ka seng Congress ka la batai kumno ba ka seng BJP ka la pyrshang da ka bor ban ïaleh pyrshah ïa ki kynhun rit paid kumjuh ïa ki kynhun niam Khristan.
“Ban pynduh pyndam ïa ka Scheduled Tribe na ki kynhun ritpaid kumjuh ki kynhun niam Khristan ba ritpaid ka long kumba shim ïa ka hok ba la ai ha ki lyngba ka khyrnit kaba hynriew jong ka Riti Synshar ka Ri India. Na ka liang jong ngi, ngi dawa ba kin panmap bad ban weng noh ïa kane na ka BJP bad ban pynneh ïa ka Scheduled Tribe jong ki thaiñ shatei lam mihngi na ka jingshong syier”, la ong ka seng Congress.
