SHILLONG:
Ka MLA na ka seng National People’s Party (NPP) na East Shillong ka Kong Ampareen Lyngdoh ka sngew ïahap ïa ka jingpyrshah ka Voice of the People Party (VPP) ban pyrshah ïa ka jingkren ktien Hindi u Lat u Phagu Chauhan ka jylla hapoh ka ïing dorbar thawaiñ ka jylla.
Ka Kong Ampareen kaba bat ruh ïa ka kam myntri ba peit ïa ka tnad kam aiñ, ka la ong ba ha u 2018 haba ka don ha ka liangpyrshah, ka la rah ïa kane ka mat.
“Ha ka 2018 nga don ha ka liangpyrshah, nga la rah ïa kane ka jingpyrshah, ki dei ban pyntip sha ka sorkar pdeng ba kam lah ban wanrah ïa u Lat bym sngewthuh ïa ka ktien Phareng. Ka liangpyrshah ka la leh ïa bynta ka bha shibun bad ngi na ka liang ka sorkar, kan leh la kajong ka bynta”, la ong ka Kong Ampareen hadien ba la mih na ïing dorbar mynta ka sngi.
Ka la ong ba ïa ka Language Bill ban kynthup ïa ka ktien Khasi bad Garo ha ka 8th schedule ka dang sahteng. “Ka liangpyrshah ka la leh ïa ka bynta, nga don ha ka liangsynshar ka lynti kam ïalam ïa nga ban leh ïa kata hynrei ngin peit pat ha kiwei ki bynta kiban wan nangne shakhmat”, ka la ong.
Lah ban kdew ba ki MLA ka VPP kila pyrshah jur ha ka por ba u Lat ka jylla u kren da ka ktien Hindi ha ka dorbar mang tyngka ka jylla mynta ka sngi. Kila mih jyndat ruh napoh ka ïing dorbar kum ka dak ka jingpyrshah ïa kane ka jingwanrah da ka ktien ka bym sngewthuh.
