SHILLONG:
Katba ki sngi ki la nang jan ba ki paidbah kin ai noh syndon ïa ka rai ïano ba kin jied ban ïalam ïa ka jylla bad ban aiti ïa u lakam ban synshar ha kine ki san snem ban wan, la ïohi ruh ba ka jingïakawang ktieh lane ka thma ktien ka la nangjur nangjur na kawei ka seng saiñpyrthei sha kawei pat.
Ka Elgiva Rynjah ruh kaba dei ka kyrtong ka Trinamool Congress (TMC) na North Shillong konstitwensi, kam shym la map hynrei ka la ther bad khyrwit tyngeh ïa ka Bharatiya Janata Party (BJP) ha kaba kane ka kyrtong ka la buh jingkylli kaba heh ïa ka BJP ka bym shym la leh ei ei ha kine ki san snem haba ka jylla ka la shah tuh shah thiem ha ki paralok jong ka.
Ka Kong Elgiva kala khyrwit ïa u myntri ka tnad kam pohïing jong ka sorkar pdeng bad ruh uba dei u nongïalam ka BJP, u Amit Shah halor ka jingkynthoh pynjah burom jong u da kaba ai nam ïa ka Meghalaya kum ka jylla kaba bamsap.
“Hadien ba la ïalong lok ha ka jingbamsap la san snem, mynta ba ka elekshon ka la don ha khmut, ka BJP ka la wanrah ïa ka kam bamsap bad ïa ki kam thok ba la leh da ka sorkar MDA. Balei ba ka BJP kam shym la leh ei ei ha kine ki san snem ba lah dep haba ka jylla ka la shah lute ha ki paralok jong ka? Shaei ki Central Investigative Agencies kiba treikam bha hapoh ki jylla ba don ha ka liang pyrshah?” la buh jingkylli ka Kong Elgiva ïa ka BJP.
Ka Kong Elgiva ka la kynthoh ruh ïa ka BJP halor ka jingpyndonkam jong ka da ki buit poh ha ka khyllipmat kaba khatduh ban pynbiej ïa ki paidbah ka Meghalaya. Ka la kynthoh ruh ba ka BJP kam leh ei ei ha kine ki san snem namar ka la don bynta lang. “Ka BJP kam shym la leh ei ei ha kine ki san snem namar ba ka don bynta lang ha ka jingbamsap. Ki la die ïa ka hok jong ngi, bad ka jylla katba ïa ka pisa na ka jylla jong ngi ka la leit lut sha ki nongïalam saiñpyrthei hapoh Delhi, Assam, bad Gujarat. Hynrei mynta ba ka elekshon ka la don ha khmut, ka BJP ka la shim da kane ka lynti ban shu pyndonkam da ki buit poh kiba khlem nongrim”, la bynrap shuh shuh ka Kong Elgiva.
Da kaba kynnoh ba ka BJP ka dei ka seng kaba bamsap tam, kane ka kyrtong ka TMC, ka la ong, ba ka BJP ka dei ka seng kaba bamsap tam bad kaba don ka jingsngew ïapher jaitbynriew. “Ki briew ka Meghalaya ki dei ki bym bamsap, hynrei dei ka BJP kaba pynlong ïa ki nongïalam ka jylla jong ngi ban bamsap. Lada u Amit Shah u long uba shlur, ai ba un phah da ka ED ban leit khynra ïa ki politishan kiba don bynta ha kane ka sorkar MDA”.
Kane ka kyrtong ka TMC na North Shillong ka la khyrwit ruh ïa u Amit Shah halor ka jinglute ïa ka pisa jong ki riew paidbah na Meghalaya da kaba buh jingkylli shaei lut ka pisa jong ka Meghalaya. “Ka leit lut sha u Amit Shah bad ka kynhun jong u. Ka TMC, kum ka liang pyrshah ha ka jylla, kan ïakhun pyrshah ïa kine ki bor ba pynpait pynpharia ïa ka jinglong kawei bad pynthikna ba ka BJP kan mad ïa ka jingrem ha ka 2 tarik u Lber”, la ong shuh shuh ka Kong Elgiva.
