SHILLONG:
Ka nongïalam jong ka All India Trinamool Congress (AITC) ka Mamata Banerjee, ha ka 22 tarik Rymphang ka la ther tyngeh ïa ka sorkar MDA ba la ïalam da ka National People’s Party (NPP) ba ka khlem wanrah kino kino ki kam pynroi hynrei tang ka jingbamsap ha kine ki 5 snem ba la leit. Ha kajuh ka por ka la ther ruh ïa ka seng Congress kaba la don baroh shi katto ha ka bor hynrei ka khlem wanrah kano kano ka roi ka par.
Ïa kane ka la kren ha madan Nekikona Tilapara ha Rajabala konstitwensi ban ïalap na ka bynta kane ka elekshon kaban sa long ha ka 27 tarik mynta u bnai.
Ka Mamata ka la ong ba lada ka TMC ka wan ha ka bor, kijuh ki kam pynroi kiba ka TMC ka la leh ha West Bengal, yn leh kumjuh ha jylla Meghalaya bad dei tang kane ka party kaba lah ban pynkhie khlieh pat ïa ka jylla Meghalaya.
“Kane ka sorkar ka la don ha ka bor ha kine ki 5 snem hynrei ka khlem leh ei ei nalor kata kam don kata ka Medical College, kam don ki surok kiba biang, ki jaka sumar ruh kim biang bad khlem ka roi ka par kaba biang hynrei tang ki jingbamsap suda”, la kynnoh ka Mamata
Ka Mamata ka la ther ruh ïa ka seng Congress ba ka la phiel ban pyndep la ka kamram kum ka liang pyrshah, “Ka Seng Congress ka pan ka jingkyrshan na ki nongthep vote hynrei kaei ka kam ba ka la leh. Nga don ha ka Congress mynshwa hynrei ki beh ïa ngi na kane ka party. Ngi ïaleh pyrshah ïa ka BJP bad man ka sngi ka party BJP ka wan ban tied shabar ka jingkhang da ki ED-CBI”.
“Ki briew lane ki party ba nabar ki kwah ban synshar ha jylla Meghalaya hynrei ki pynbor pat ban wanrah da ka CAA, NRC, ki kuli bad jingbamsap hynrei nga ong ba ïa ka jylla Meghalaya yn synshar hi da ki nong Meghalaya bad ym da ki nong Guwahati lane Delhi bad mangi ruh ngim pynïaid na West Bengal. Ngi dei ki paralok jong phi bad ngin ïarap ïaphi ha ka por ba phi donkam”.
Ha kawei pat ka liang u National Spokeperson ka TMC u Abhishek Banerjee u la kular ba lada ka TMC kan wan ha ka bor kan pyntreikam ïa ka shkim “WE Card” hapoh shisngi.
“Ngin pyntreikam ïa ka skhim “WE Card” hapoh shibnai ka jingthaw sorkar jong ngi lada ngi wan ha ka bor bad baroh ki kynthei na man la ki longiing kin ïohT.1,000 man la u bnai bad pynpoi lyngba ki Bank Account jong ki”, la ong u Abhishek.
Halor ka jingkynnoh ba dei tang ka TMC ba lah ban pynrem ïa ka BJP ha u snem 2024, “Ban pynthikna ka jingop ka Meghalaya TMC hapoh ka jylla, ngi long kawei ban pynduh ïa ka BJP na Delhi ha ki sngi ban wan”.
Ha kane ka sngi la donlang ki nongïalam kynthup u Derek O’Brien, TMC MP u Mahua Moitra, nongïalam ka liang pyrshah u Dr. Mukul Sangma, u State Vice-President u Bah James B Lyngdoh, u kyrtong na from Phulbari SG Esmatur Mominin, bad kiwei.
