SHILLONG:
Ka jingïalap elekshon ban pan jingkyrshan ïa u kyrtong ka United Democratic Party (UDP) ka Mawphlang konstitwensi, u Bah Beyond Matthew Kurbah ha ka shnong Nongspung ha ka 18 tarik Rymphang ka la kylla long kum ka rynsan ban pyni ïa ki nia jong ki jingshisha kaba la khlei hi da u MLA ba mynta jong ka Mawphlang, u Bah Eugeneson Lyngdoh halor ki kam bah kaba u kpa jong u, u la lah ban leh kum u nongmihkhmat bad kumjuh ruh kum u nongthawaiñ na ka bynta ka konstitwensi bad ka Jylla.
U Bah Eugeneson u la kren kum ban pynshisha bad pynshai ïa ka kaei kaba kiwei ki kam bad ki kam kiba u kpa u la pyndep halor ka jingangnud jong u paidbah ha kaba u la ong, “I pa ha ka jingtreikam jong I, I la lah ban pyndep ïa kiba bun ki jingangnud ki paidbah, kum u khun nga ïohi ba I pa I don ïa ka mynsiem shakri bad kata ka dei ban shakri ïa u paidbah bad kiba la ïohi bad mad kidei kiba lah ban pynshisha.”
“Kaei kaba sngewsih ka long ba ynda nga la rai ban nym ïakhun elekshon, ki don katto katne ki candidate kiba la shim kabu halor ka rai jong nga bad ban shim kabu ia ki kam kiba I pa I la trei na ka bynta u paidbah bad kane ka pynshisha ba kine ki briew kiba shim kabu ki dei ki nongïalam kiba pyrkhat ïa lade shimet,” ong u Bah Eugene.
Haba pynsngew sha u paidbah ïa ki jingshisha katkum ki kot ki sla kiba u la lum, nyngkong eh u la ong ba u ïeng ha katei ka jaka kum u khun samla jong ka jaitbynriew bad haba u ïohi ba u rangbah u ïeng ha ka nongrim ba skhem bad ba shai bad ka nongrim kaba hok, u dei ban pyni ïa ki jingshisha bad ban kdew ba kaei kaba uwei u kyrtong u shim kabu bad ban kam ba ïa ka Tyrsad PHC la wanrah da u, ka pynpaw shisha ba une u kyrtong u kheiñ biej ïa ki paidbah bad ka jinglong lui lui jong ki.
U Bah Eugene u la ong, lada ïaid katkum ki kot ki sla, ka Tyrsad PHC kaba ki paidbah ki la angnud da ki snem ka urlong tad ynda u MLA barim ka Mawphlang hi u la ïakhun ban beh shaduh sha Delhi kata haduh ba un ïoh ïa ka administrative approval ha u snem 2021 kata tang khathynñiew sngi shuwa ba un khlad na kane ka sla pyrthei bad ynm tang kata hynrei wat ka surok na Mawphlang sha Mawsynram kadei ka mat kaba u kpa jong u, u la kren nyngkong namar u shim ba ka surok udei u bud lum ïa ka roi ka par bad ïa kane u la la leh da kaba ïawer lang bad ki arngut ki MLA, u MLA na Mawsynram bad Ranikor konstitwensi ban ïasoi lang ïa ka proposal.
Halor ka rai ban pynïeng ïa u Bah Beyond kum u kyrtong, u Bah Eugene u la ong kane ruh kadei ka jingkwah jong u namar ba u kwah ba u briew u ban shimti ïa kane ka kam bad pyndep ïa ki kam kiba u paidbah u angnud udei ban long u briew uba lah ban trei bad ba don ka jabieng bad uba don ïa ka nongrim ban ïeng ha ka hok ym uba im ha ka thok shukor.
Halor ka jingïaineh jong u ha ka party UDP, u Bah Eugene u la ong ba ka daw jong kane ka dei halor ka jingsngew shngaiñ ïa ka party kaba don jingkyrmen bad kaba don ïa ka shap (ka bom) kaba tied ïa u klong snam jong ka jaitbynriew ba kumno ngin pynurlong ïa ka jingangnud jong u paidbah.
Halor u kyrtong uba la don ha ka party, nga ong ba lada phi ai tiket ïa uta u rangbah ngan nym kyrshan namar kum u samla nga peit ïa u briew u ba lah ban trei bad ba don ka jabieng khnang u lah ban buddien ïa ka eh ka shon bad ruh ban pyndep ïa ka jingangnud jong ka jingurlong jong phi ki paidbah. Nga ïeng hangne da ka jingsngew shngaiñ namar ngi don ha ka party kaba don jingkyrmen.
Ha kawei ka liang u president rangbah ka UDP, u Bah Metbah Lyngdoh haba ai jingkren ha katei ka sngi, u la ong, ha kane ka elekshon kaba mynta, kiba bun ki kren ïa ka roi ka par, ka klur ka tyngka hynrei ngi klet ban phai halor ka jaitbynriew bad nga sheptieng ba ïoh ngi bakla ha kane ka kynti, shaei ka lawei jong ki khun ki kti namar kiba bun ki la shu ïakren beit tang shaphang ka spah ka phew.
U Bah Metbah u la ong, ka jingpynlut pisa ha ka jingpynkhreh elekshon ka da i ma bad ishyrkhei shisha namar naei kato ka pisa ka wan bad naei pat kin lum ia kaba ki la pynlut bad bynrap da kaba ong, kumta ka donkam ïa ngi iwei pa iwei ban pyrkhat haba ngi thep vote namar ka kam elekshon kam dei tang ka kam tamasa ne ban pynbiej paidbah hynrei ka dei ka kam ïa ngi ban pyrkhat jngai bha shaphang ka lawei jong ka Jylla.
Shuh shuh u la ong, ba lada ki paidbah hi ki don ka jingsngew na ka bynta ka jaitbynriew kidei ban ai lad shisien ba ka UDP kan don ïa u nombor uba lah shisha ban ïalam ïa ka Jylla bad dei ynda la ïoh uta u nombor, ngin sa lah ruh ban pyni ïa ki kam kiba u paidbah hi u angnud.
Kiwei kiwei kiba la ai jingkren ha katei ka sngi ki kynthup ïa u Bah Beyond Matthew Kurbah, u Bah Brolding Nongsiej u kyrtong ka UDP na MAwthadraishan bad kiwei kiwei ki riew rangbah.
