SHILLONG:
U kyrtong ka Trinamool Congress (TMC) na Mawkyrwat, u Bah Sounder S Cajee, u la ther kylla ïa u myntri rangbah u Conrad Sangma halor ka jingkynnoh jong u da kaba ong ba long kumba ymdon liang pyrshah ha ka jylla bad ong ba u myntri rangbah u la kheiñ beiñ ïa ka rukom ka synshar paidbah. Kane ka jingkhyrwit u Bah Sounder ïa u Conrad ka la long ha ka jingïalang ba la long ha ka madan jong ka Nativity High School hapoh Mawkyrwat, South West Khasi Hills ha kaba da ki hajar ki paidbah nongkyrshan ki la wan sakhi. Ha kane ka sngi la don ryngkat lang ruh u MP ka Rajya Sabha bad u nongïalam ka AITC Parliamentary Party, u Derek O’Brien.
Haba kren ha kane ka jingïalang u Bah Sounder u la ong, “Ka long kaei kaei ka bym lah ban pdiang na ka bynta u Myntri Rangbah ban pynhiar kyrdan ban buhrieh ïa ki jingshisha. Da kaba kdew ba kam don ka liang pyrshah, u la kheiñ beiñ ïa ka rukom synshar paidbah namar ba u Dr. Mukul Sangma u dei u nongïalam ka liangpyrshah”.
Haba kren kynthah ïa u myntri rangbah halor ka jingleh jong u kum bym ïohi ïa ki jingkynthoh bad ki jingainia ba shong nongrim ka Meghalaya TMC, une u kyrtong ka TMC na Mawkyrwat u la ong, “U myntri rangbah u kham sngewtynnad ha kaba ïalam bakla ïa ki paidbah. Kane ka pyni shai ba u khynñiuh ban ïohi ïa ka jingkyrshan ba radbah ba ka TMC ka ïoh na ki paidbah bad ka jingïaid lynti jong ka ban thaw ïa ka sorkar. U la leh kum bym suid ñiew ruh ïa ki jingkynthoh kiba ai jingmyntoi ba u la ïoh na ka por sha ka por na ka TMC ba ïalam u Dr. Mukul”.
U Bah Sounder u la ong ruh ba kane ka seng ka la pynduh thiah duh dem ïa ka NPP da kaba ong ba ki jingpulom ha ka jingtreikam ka sorkar MDA ba la ïalam da ka NPP ha baroh ki liang bunsien la kdew da ka TMC bad kane ka la pynduhbor ïa ki nongïalam ka NPP ha kaba ki mad jingeh mynta ban ïakhun pyrshah ïa ka jingshisha.
U la ong ruh ba dei tang ka TMC ha ka jylla kaba lah ban pynduh thiah duh dem ïa u myntri rangbah, ha kaba ka party ka dawa ban ai jingkhein ïa ka sorkar katba ka nang pynpaw paidbah ruh ïa ki kam bamsap hapoh ka jingsynshar jong ka. U la ong ruh ba ka TMC ka kwah ban kdew ba mynta ka la dei ka por na ka bynta u Conrad Sangma ban phla ba umdei u myntri rangbah ba ïalam ïa ka jylla hynrei u dei tang ka dur bula ba shah pynïaid na Delhi bad Guwahati.
