SHILLONG:
U Symbud Myntri Rangbah ka Jylla u Bah Prestone Tynsong, haba kylli ïa ka jinglong liang pyrshah hapoh ïingdorbar thawaiñ ka jylla bad jinglong paralok pat ha ïingdorbar thawaiñ ka Khasi Hills Autonomous District Council, u la ong, “Halor kane ka jingkylli yn ym don ba nang ban jubab hynrei ka ïingdorbar thawaiñ ka jylla bad ka KHADC ka dei ka shlem synshar ka ba ïapher kawei na kawei”.
Ha ba ïakren bad ki ladpathai khubor halor ka KHADC, u Myntri ba dei peit ïa ka tnad District Council Affair u la ong, “Ka ïingdorbar Thawaiñ ka jylla bad ka District Council ki dei ki shlem synshar ki ba ïapher kawei na kawei, lada phi kren halor ka District Council, ngi lah ban khot ba ka dei ka organization bym don party, kaba mano mano ruh ki lah ban ban pynïasoh sha kano kano ka party katba ki mon”.
Haba kylli halor ka jingpynkylla noh ïa u nongïalam ha ka KHADC, u la ong, “Ngam dei u MDC, hynrei nga dei tang u myntri ba peit ïa ka tnad District Council Affair (DCA), bad ka kamram jong nga ka long tang ban peit ïa ka bha ka miat jong ki lai tylli ki District Council”.
U la bynrap, “Kam dei ka kamram jong nga ban kylliang ïa ki nongïalam ha ka District Council hynrei kadei ka kamram jong ki MDC ha kine ki lai tylli District Council ba kin jied ïa u nongïalam jong ki kat ba ki mon”.
Haba kylli halor ka jingpynpaw jingbymhun u President ka UDP halor ka jingweng ïa u CEM ka KHADC, u la ong, “Kam don kano kano ka jingpynpaw ïa ka jingbym hun na u nongïalam ka UDP halor ka jingshahweng u CEM ka KHADC na ka party UDP bad ka dei ha ki MDC ka KHADC bad kan shong ha phi ban wad balei la thaw ïa ka EC thymmai ha KHADC”.
Haba kylli mano ban long ki dkhot ha ka EC u la ong, “Ngam tip kan bha ban kylli na u CEM thymmai ïano ba un jied ïa ki dkhot jong ka EC thymmai ha ka KHADC”.
Haba kylli halor ka jingïajan ka Congress ba ha jylla ka dei ka ba pyrshah NPP katba ha KHADC ka ïatreilang bad ka NPP, u Bah Prestone u la ong, “Kumba nga la ong, ba ka District Council, ka dei ka organization ka ba khlem party, kumta ym dei ban kylli na nga halor kane namar ba yn ym don mano mano ruh ki ban lah ban jubab ïa kane ka jingkylli hynrei lada phi kylli halor ka ïingdorbar thawaiñ nga lah ban jubab lut”.
