SHILLONG:
U kyrtong ka UDP u Bah Synshar Kupar Lyngdoh Thabah u la wan ban thep ïa ka vote jong u ha ka 10 tarik Jymmang ha Lam Jingshai Secondary School, kaba don hapoh Shiliang Dongki polling station, hapoh Sohïong.
Haba kren bad ki nongthoh khubor, u Bah Synshar u la ong, “Nga sngewtynnad. Nga ainguh ïa U Blei na ka bynta kane ka sngi bad nga sngewskhem ban jop. Ka sur jong u paidbah ha kylleng ka Sohiong ka pynpaw ba ki kham noh mynsiem ïa ka seng riewlum, ka UDP”.
Haba kren halor ki mat treikam jong u, u la ïathuh ba kidei kijuh ki mat naduh ka por u Maheh, kata u Bah HDR Lyngdoh (bam kwai ha dwar U Blei), kiba dei ha ka roi ka par, u la pynpaw ruh ki mat kiba kham kongsan, “Ka Inner Line Permit, ka Roster System bad ka Uniform Civil Code (UCC), kine ki dei ki mat ba hap ban ïakren bha bad lada u paidbah u ibit ban mih khmat sha iing dorbar ngan kren ïa kine”, la ong u Bah Synshar.
Haba kren halor ka jingïakhun la ka dei ka jingïakhun paralok hapdeng ka NPP bad UDP kiba dei ki seng ba donlang ha ka sorkar MDA II, u la ong, “Ha politik ym du don paralok, shisien ba la mut te la mut. Kam ju don ka jingïakhun paralok”.
U la pynpaw ruh ïa ka jingieid u paidbah ba watla um pyndonkam da ka bor pisa, hynrei ki kyrshan ïa u bad u la ïathuh ruh kaba la pynlung mynsiem ïa u ka dei ban ïohi ba ki paidbah ki rah la ki jasong ban wan sha ki jingïalang jong u.
“Haba u paidbah hi u la rai ngam donkam ïa ka pisa. Nga la wan kylleng kylleng ki paidbah ki rah da ka jasong ban wan sha ka jingïalang bad nga lung ka mynsiem”, la ong u Bah Synshar.
U la ong ruh ba ki paidbah mynta kim kwah shuh tang u nongmihkhmat ban leit sha iing dorbar thawain ka jylla, hynrei ki kwah da uta u ban ïasaid, ban kren bad ban rah ïa ki mat jong u paidbah.
