NONGSTOIÑ:
Ka long shisha ka sngi ka ban sah jingkynmaw ïa ki paidbah ka thaiñ Nongstoiñ ba ha ka sien kaba nyngkong ka Seng Congress kala ïoh ban mad ïa ka jingjop kaba nyngkong ha ka jingïakhun ïa ka election MLA mynta lah da ki phew snem.
Ha ki snem bala dep ka seng Congress kam ju ïoh mad ïa ka jingjop ha ka jingïakhun ïa ka election MLA na Nongstoiñ namar lah bun phew snem lah ju bat bad synshar da ka Seng HSPDP da ka jingjop lynter u bah Hoping Stone Lyngdoh kum u MLA haduh ba un da khlad noh na kane ka sla pyrthei.
U Bah Gabriel Wahlang u la sdang paw nyngkong ha ka kam saiñ pyrthei da kaba u la shah jied kum u MDC shu sieh ha u snem 2015 bad hadien ka jingkhlad noh u MLA ka HSPDP u bah Hoping Stone Lyngdoh kala don ka jingïakhun kaba shyrkhei ha ka election shiteng samoi ha kaba ka Congress kaba don ha ka bor synshar kala sei ïa u bah Gabriel Wahlang ban pynïakhun hynrei ïa ka jaka ha Nongstoiñ la bteng ban bat hi da ka HSPDP ha kaba u bah Diosstarness Jyndiang u la jop ïa ka election shiteng samoi.
Ka jingwan biang ka election ban jied nongmihkhmat sha ka ïing dorbar thaw aiñ ka Jylla ha u 2018 ka paidbah ka Nongstoiñ kila kwah ban ïohi ïa ka jingkylla ha kaba u kyrtong ka Seng NPP u bah Macmillan Byrsat u la jop ïa ka election bad naduh kane hi kapor ka HSPDP kam lah shuh ban khie khlieh haduh mynta.
Haba phai pat ïa ka Seng Congress ha Nongstoiñ kala ïoh ban mad ïa ka jingjop election na Nongstoiñ tang ha ka jingjied ïa ki nongmih khmat sha ka Khasi Hills Autonomous District Council (KHADC) ïa kaba la jop nyngkong da u bah Nestingdar Nongdkhar ha u snem 2004 bad u bah Gabriel Wahlang ha u snem 2019.
