SHILLONG:
Ka myntri jong ka Sorkar Jylla bad ruh kaba dei ka nongai ktien jong ka NPP, ka Kong Ampareen Lyngdoh ka la ong ba ka MDA II ka pdiang sngewbha ïa kino kino kiba wan ai jingkyrshan, kane ka jingkren ka Kong Ampareen ka la long hadien ka jingkylli ba la ka Congress kan ai ïa ka jingkyrshan ïa ka NPP ha ka jylla, hadien ba ka lah dep ban kyrshan ha Khasi Hills Autonomous District Council (KHADC).
“Na ka liang jong nga hi, kino kino kiba ïatreilang bad ka NPP mynta ka long ka jingpyrshang kaba bha. Ngi pdiang sngewbha ïa baroh kiba kwah ban ïatreilang bad ka NPP”, la ong ka Kong Ampareen.
Na ka liang ka Kong Ampareen ka la ong ruh ba ïa kane ka lahdep ban ïohi lypa mynta la kumba shi snem ba kine kiei kiei kin sa jia bad ka la ong ruh ba mynta ba ka don bad ka NPP kam kwah shuh ban kren biang ïa kajuh bad ban pynïanujor ïa ka jinglong jingman jong ka bad kiwei pat.
“Ha kaba kut ka sngi hi, ki politishan ki hap ban lait lait na ka jingduhnong. Kam dei tang ban lait na ka jingduhnong tang ïalade, hynrei ka dei na ka bynta ka kam jong ki, ka jingshakri jong ki bad ka jingtrei jong ki”, la ong ka Kong Ampareen.
Na ka liang ka Kong Ampareen ka la pynpaw ruh ïa ka jingsngewkmen halor kane ka jingkylla ha ka EC jong ka KHADC da kaba kdew ba ki don ka jingïadei kaba jan bad ka Congress.
“Ha politik kam dei tang na ka bynta ka jingsngew jong u briew shimet, hynrei ka dei na ka bynta ka jingkylla kaba ïadei bad ka politik”, la ong ka Kong Ampareen bad bynrap ruh “Nga sngewkmen ba kane ka la jia, namar ngi don ka jingïadei kaba jan bad ki paralok Congress”.
“Ha nga hi shimet kane ka dei kaba bha eh”, la ong ka Kong Ampareen.
Halor ka jingkynnoh ba kane ka jingleh ka NPP ka long ka jingbym kyrshan bad ka jingbym skhem ka jingïatreilang ha ka sorkar bad ka UDP, na ka liang ka Kong Ampareen ka la ong ba kam don jingmut ban shu ïakynnoh bad kaba biang eh ka dei ban kren hi da ki MDC kiba sngewthuh halor ka jingmad jingshem jong ki.
“Ngam sngewthuh ba balei kan don ka jingkynnoh halor kane. Lada ki MDC kim sngew shaniah shuh ïa u nongïalam ïa ka EC, ki don ka hok ban pyrshah ïa kane bad ban wanrah jingkylla”, la ong ka Kong Ampareen.
Ka Kong Ampareen ka la ong ruh, ba ka jingshisha hi ka long ba lada phim dei ka seng saiñpyrthei kaba lah ban thaw pyrthei dalade kumta phi hap beit ban wad ïa kiwei pat ban ïatreilang.
“Hooid ka don ka jingkhyllem kaba ktah, hynrei lada kane ka dei na ka bynta ka jingbha nga kyrshan ïa kata”, la pynshai ka Kong Ampareen.
Kane ka jingkyrshan ka Congress ïa ka NPP ha District Council, ka la don ruh ka jingsngew jong ki briew ba ka lah ban poi shaduh ka jingïatreilang ha ka sorkar jylla, na ka liang ka Kong Ampareen ka la ong ba ka MDA ka pdiang ïa kano kano ka seng saiñpyrthei ban ïatreilang bad kimdon kata ka kyndon kaba khang ïa ki ban ïatreilang bad kano kano ka seng.
“Ngi ïatreilang na ka bynta ka jingbha jong ki paidbah. Balei phi donkam ïa ka sorkar kaba skhem? Na ka bynta ka jingbha jong ki paidbah hi baroh”, la ong ka Kong Ampareen.
“Kan long ka jingmyntoi ïa baroh lada ngi pynkhlaiñ shuh shuh ïa ka MDA II”, la bynrap shuh shuh ka Kong Ampareen.
