SHILLONG:
Ha ka jingkheiñ jong u Bah Macmillan Byrsat u MLA ka NPP na Nongstoiñ Constituency, ka jingïakhun ïa ka elekshon 2023 ha Nongstoiñ Constituency, kan long tang hapdeng ka National People’s Party (NPP) bad ka Congress bad kan ym don kiwei kiwei ki party ki ban buh jingeh ïa u.
Haba kren bad ki lad pathai khubor ha ka 7 tarik Nohprah, u Bah Macmillan u la kam ba ha Nongstoiñ Constituency, ka NPP ka la ïaid shakhmat bha hynrei ka jingïakhun ha kane ka elekshon kan long beit hapdeng ka NPP bad ka Congress namar ka Congress ka dei ka party kaba la kham rim bad kaba la don naduh mynshwa.
“Ha ka elekshon 2018, nga la pynkhreh elekshon tang ar bnai bad nga la jop, kane ka jingjop jong nga ka dei ka jingangnud jong ki paidbah na Nongstoiñ Constituency, kiba la dep ïohi lypa ïa ka jingtreikam jong nga kum u Lyngdoh ka Hima Nongstoiñ”, u la ong.
“Ha u snem 2015, ka ïing Kashari jong ka High Court ka la pynmih ïa ka hukum ba ki rangbah shnong kin ym lah shuh ban ai ïa ka syrnot ïano ïano ruh hynrei ka Hima Nongstoiñ ka lait na kane ka rai, kane ka long namar ha u snem 2003, ka Hima ka la pynkhreh lypa ïa ka Nongstoiñ Syiemship Act kaba ai bor ïa ki rangbah shnong ba kin ai syrnot”, u la bynrap.
“Ha ka elekshon 2018, nga la lah ban pynkohnguh ïa ki paidbah na ka bynta ka jong ki bad ki la pyni ïa ka jingshaniah ïa nga kaba la pynshlur ïa nga ban ïakhun ïa ka elekshon nga ïohi ïa ka jingdonburom ki nongshong shnong ka Nongstoiñ bad kum ba ong ka ktien ba ki dei ki paidbah ki ba ngi lah ban shaniah”, u la ong.
“Ha ka elekshon 2018, ka don ka jingkynnoh pyrshah ïa ka party hangne hangtei hynrei kine ki jah noh namar ba ka dei ka jingkynnoh ba khlem nongrim bad ki paidbah ki la jied ïa nga namar ba kham khraw ka jingshaniah ban ïa kita ki jingkynnoh”, u la bynrap.
U Bah Macmilan u la ong ka elekshon 2023, u la trei bha na ka bynta ka Nongstoiñ Constituency bad u la lah ban wanrah ïa shibun ki kam pynroi la ka dei ha ki surok, ka umbam um dih, ka bording, ki jaka sumar, ki jaka pule, ki jaka jngohkai pyrthei, ki ba mynshwa kim ju don.
U la bynrap, “Ka Nongstoiñ College ka dei ka jaka pule kaba la jan ka rta bad nga, ka dei ka jaka pule kaba la heh bha bad ki nongpule ki la kot sha ka 3000 ngut, hynrei kam ju don kano kano ka jingïarap na ka sorkar hynrei mynta ki la ïoh sanction ïa ki 15 tylli ki post na ka bynta ki nonghikai”.
U la ong ba ha kane ka elekshon ka ban wan, kan ym dei bad kano kano ka party hynrei ka jingïakhun kan long ban ïoh ka jingshaniah jong u paidbah bad u kyrmen skhem ïa ka jingshemphang u nongshong shnong ka Nongstoiñ.
