MAIRANG:
Ki saw ngut ki kyrtong napoh Mairang Konstitwensi kiba dei na ki seng saiñ pyrthei bapher bapher ki ban ïa aireng pyrshah ha kane ka elekshon sha ka ïing dorbar thaw aiñ ka jylla ka ban sa long ha kine ki khyndiat sngi, ha ka Sngi thohdieng jong ka taïew ki la ïapoi ryntih lang sha kawei ka rynsan ban khlei ïala ki nia ki jutang bad ïa ki nongrim ba ki ïeng ban ïakhun ïa ka elekshon bad ïa kane ka rynsan kaba la tip ruh kum ka common platform la pynlong da ka Dorbar shnong Pyndengumiong ha Tirot Sing Memorial hall Mairang.
Kine ki saw ngut ki kyrtong ki long u Bah Batskhem Ryntathiang na ka Seng Congress uba long ruh u MDC jong ka Mairang Konstitwensi nangta u Bah Metbah Lyngdoh u MLA jong ka Mairang Konstitwensi na ka seng UDP, u samla Mark Rinaldy Sawkmie na ka seng BJP bad u bah Shanlang Warjri na ka seng VPP.
Baroh saw ngut ki kyrtong ha kane ka Sngi ki la pynksan ïa la ki nia ki jutang ki jong ki. U Bah Metbah Lyngdoh u kyrtong na ka seng UDP ha ka jingkren jong u, ula ong ba baroh 3 tylli ki elekshon kiba la dep ki paidbah kila ai ka jingkyrshan ïa u bad mynta ka kynti ruh u sngewkhem ba ka jingwan kyrshan noh jong ki nongïalam kiba snar jong ka seng Congress un dang ïoh biang ïa ka jingjop bad ba ki paidbah ruh kin ym kyntait bad kin nang ïai jied biang ïa u. “Ngam shym wan ban pynjot ïa ka Mairang Konstitwensi hynrei kaba pynsngewsih ïa nga ka long kiwei kiba ïalap elekshon pyrshah ïa nga ki la kren ïa nga kum u nongpynjot u nongpynkulmar shnong ha Mairang Konstitwensi baroh kawei,” la ong u Bah Metbah.
U Bah Shanlang Warjri uba dei u kyrtong jong ka Seng VPP, ula ong ba u Blei ula ai ïa u ka mynsiem jong ka jingkitkhlieh ha kaba u ïohi ïa ki khunswet ki bym dei kiba haïing jong u ,ki longïing kiba duk ki bym don jingïadei hynrei ka ktah ïa u bad dei na ka jingai u blei ïa ka jingkitkhlieh kaba pynlong ïa u ba un ïeng ha kane ka rynsan bad ba ha kane ka elekshon watla kiwei ki ïaid rally hynrei ki nongkyrshan jong ka seng VPP ki long kiba jai jai bad ula ong ruh ba ha ka jingïakhun ki la dep jop lupa ha ki nongrim bad ki mat treikam ban ïa kawei ki seng.
Nalor kata ula ong ruh ba ki paidbah jong ka Mairang Konstitwensi ha kane ka elekshon kaba mynta kin jied ha ka hok ban ïa ka thok ka shukor bad kin jied ïa ka synshar khadar kaba khuid ban ïa ka bamsap bad ïa kine yn sa tip ha ka 2 tarik kaba dei ka sngi ñiew vote. U bah Shanlang ula kyntu ruh ïa ki paidbah nongthep vote ba haba ki leit ban thep ïa ki vote ki jong ki ha ka 27 tarik kidei ban da pyrkhat na ka bynta ki rangli ki juki na ka bynta ki khun samla bad ruh na ka bynta ban wanrah ïa ka jingbha hapoh ka Konstitwensi,ha kaba baroh shi katta ki la ailad ïa kiwei ki seng ha kaba ki la pynhiar arsut ïa ka jylla,u bah Shanlang ula ong ruh ba “ka lynti kaba rim kan poi biang shajuh bad ka lynti kaba thymmai kan wanrah ïa ka synshar khadar kaba thymmai.”
Katba na ka liang ka jingïalap elekshon u Bah Batskhem Ryntathiang u kyrtong ka seng Congress uba dei ruh ha kajuh ka por u MDC jong ka Mairang Konstitwensi ula ai khublei ïa ki paidbah kiba la kyrshan bad ai ka jingïarap ïa u ba un long kum u MDC bad kum u wei u briew uba ïa kajuh ka kyrdan lem bad kiwei.Ula ong ruh ba ha ka jinglong MDC ka jong u ula ïaleh kat kaba u lah ban pyndep hok ïa ki kamram hynrei kin dang don pat ki ban sa pynthame ïa ki paidbah ban ong ba u khlem pat lah ban leh eiei bad ba u shu thok hynrei na ka liang jong u bah Batskhem ula pynshai ba ka jinglong MDC ka jong u kam pat kut ka dang don sa shi snem ban shakri bad ban pyndep ïa ki kamram ki jong u kum u MDC.
U Bah Ryntathiang ula ong ruh ba kum ka jaitbynriew ban im ha la ka ri ngim lah ban kynnoh ïa ki paidbah hynrei kadei ïa ki nongïalam ba kin kylla shwa khnang ba ka jingkhmih lynti jong ki paidbah kan urlong bad ula buh ruh ka jingkylli ba kum ki nongïalam lada ki thok ki shukor da kaba pynbiej ïa ki paidbah shano ka lawei jong ki kan poi.
U samla Mark Rinaldy Sawkmie haba kren ha kane ka rynsan ula ong ba ka seng BJP ka don ïa ka bor kaba khlaiñ ha ka ri India baroh kawei hynrei ha ki por elekshon ki don kiba pynthame da kaba ong ba ka seng BJP ka lehbein ïa ki Khristan bad ïa ki rit paid,”Balei kata ka jingleh bein ïa ki Khristan bad ïa ki rit paid ka wan tang ha ka por elekshon,” buh jingkylli u samla Rinaldy Sawkmie.
U samla Mark Rinaldy ula ong ruh ba ka seng BJP lada ka ïoh ïa u soh jong ka jingjop ha kane ka kynti kan wanrah shibun ki jingdonkam hapoh kane ka thaiñ bad lada kam poi sha ka thong ruh kin buh ïa ka BJP help desk ha Mairang Konstitwensi ha kaba na ka liang jong ka seng kin bud dien ban pynthikna ïa ki skhim ki bapher bapher kiba wanrah da ka sorkar kmie ba kin poi sha ki khyrdop ïing jong ki nongshong shnong jong ka Mairang Konstitwensi.
