SHILLONG:
Hadien ba ka party United Democratic People (UDP) ka la jied ïa u Bah Robertjune Kharjahrin ban mih khmat na ka party na ka bynta ban ïakhun ïa ka Lok Sabha Election 2024, U MLA barim ka Mawlai Constituency Bah Process T Sawkmie mynta ka 27 tarik Nohprah 2023, u la ong ba u pdiang ïa kane ka rai bad na ka liang jong u, u lah ban pynkhreh noh na ka bynta ban mih khmat ïa ka UDP na ka bynta ka election MDC kaba lah ban long ha u snem 2024.
Lah ban kdew hangne ba na ka liang u Bah Process T Sawkmie, u la pynpaw sha ka party UDP ba u don ka jingthrang ban ïakhun ïa ka Election Lok Sabha, hynrei na ka liang ka party ka la jied ïa u Bah Robertjune Kharjahrin ban mih khmat ïa kane ka election na ka party .
Haba kren sha ki lad pathai khubor u Bah Process T Sawkmie u la ong ba u la pynpaw ïa ka jingthrang ban ïakhun ïa ka election MP namar kane ka election ka dei kaba eh bad hap ban ïoh ka jingkyrshan na baroh ki paidbah ha baroh ki Constituency .
U la ong, “Nga dei u nongmihkhmat u ba la jop 3 samoi, kum u MLA bad nga la ïoh ruh ban long kum u Myntri ka Sorkar bad u MDC bad nga la don ha ka saiñ pyrthei mynta la 30 -35 snem bad nga la long u ba bit ba biang bha ha baroh ki liang”.
U la bynrap, “Hynrei haba ka party ka la jied noh ïa u Bah Robertjune kharjahrin kum u kyrtong ka UDP, nga kum u briew ka party nga hun, ngan bud bad ngan ïatreilang bad ka rai jong ka party.”
Haba kylli halor ka election MDC, u Bah Process T Sawkmie u la ong ba ym pat shim kano kano ka rai hynrei u shim kano kano ka kam, kam dei ka ba heh ne ka ba rit .
“Namar nga la long teng u Myntri ka sorkar, u MLA kam long shuh ba ngan long MDC kane ka dei kaba bakla namar ha ki por ba la dep nga la long teng ruh u MDC,” u la ong.
“Kumta halor kane ngan sa shim ka rai, bad lada u paidbah u kloi ban ai ka jingkyrshan bad ka jingshaniah nga kloi nga kloi ban kit ïa ka kam la ka dei ka MLA ne MDC ruh,” u la bynrap.
