SHILLONG:
Hadien ka jingsaphriang jong ka wei ka dur sha ki rynsan social media ka ba don na u nongthep vote u ba la shondur ïa lade ha ka por ba u ñion ïa u budam ban thep vote ha ka 27 tarik u Rymphang, u Chief Electoral Officer (CEO) u Bah Frederick R Kharkongor, ha ka 1 tarik Lber u la pynmih ïa ka hukum sha u District Election Officer (DEO) ka Ri-Bhoi District ban pynlong mardor ïa ka jingtohkit.
Katkum kane ka hukum ka la ong ba la hukum ban pynlong ïa ka jingtohkit halor ka jingkynnoh ba ki la pynkheiñ ïa ka kyndon bym shah ban rah mobile lane ban shon dur ha ka por ba ki thep ïa ka vote jong ki ha jaka thep vote.
“Haba ïadei bad kane ka jingpynkheiñ kyndon, phi kum u DEO ka Ri-Bhoi phi dei ban phah mardor ïa ka jingtohkit ban pynshisha ïa kane ka jingkynnoh, kaba la mih na ka 35-Shiliang Umdoh Polling Station jong ka Mawhati konstitwensi” la ong ha kane ka hukum.
U la bthah shuh shuh ba u DEO, hadien ba u la dep ïa ka jingtohkit, u dei ban pynshitom tyngeh ïa ki Polling Official jong kane ka Polling Station ki ba khlem shimkhia ïa kane ka jingmana bad shah ban rah mobile bad shondur hapoh ka kamra thep vote.
La bthah ruh ïa ka khaiphot jingtohkit la dei ban aiti noh ha ka 3tarik mynta u bnai bad dei ruh ban pynshitom ïa u ne u nongthep vote u ba la pynkheiñ ïa ka ne ka kyndon hadien ba la dep ban pynshisha ïa ka jingleh jong u.
Ha kawei pat ka liang, u Returning Officer ka Mairang konstitwensi mynta ka sngi Balang, u la ujor ejahar sha ki Pulit ka Mairang pyrshah ïa uwei u nongthep vote u ba la shon ïa ka dur ha ka por ba u la thep ïa ka Vote ha ka 27 tarik u Rymphang.
Ha kane ka ejahar, u RO u la kdew ba u la ïoh jingtip ba ha ka sngi thep vote, kata ha ka 27 tarik Rymphang, uwei u briew u ba dei na ka Pyndengumlong Dong gate Polling Station u la ring video ïa lade ha ka por ba thep vote.
“Kane ka dei ka jingpynkheiñ ïa ka kyndon 49m jong ka Conduct of Election Rules 1961, kumta u kyrpad ïa u Officer-in-Charge ka Mairang Police Station ban leh ïa kaba donkam”, u la ong.
