SHILLONG:
U nongïalam ka People Democratic Front (PDF) u bah Banteidor Lyngdoh u la kyntu ïa ki ladpathai khubor ba kin ap ïa ka por ba biang ba kin sa pynbna ïa ka rai jong ki la kin leit ne em ban pynïasoh sha ka National People Party (NPP).
Ha ba ki ladpathai khubor ki la kynduh ïa ki ar ngut ki MLA ka PDF bad kylli halor ka jingpynïasoh NPP noh ki MLA ka PDF u bah Banteidor u la ong “Ngam don jingtip eiei, mano ba ong ïa kane?, ngam kwah kren eiei hap ban ap ïa ka por ka ba biang ngin sa ïathuh lut”.
Haba kylli lano phin pynïasoh u la ong “Ngam tip lano bad naei ka mih kane ka jingïakren? ka don ka jingïakren ban pynïasoh noh sha ka NPP hynrei ngim pat shim rai eiei bad ngam kwah ban kren eiei mynta hynrei long ki ba ïaishah bad ap ïa ka por ba biang” .
Wat la na ka liang ki nongïalam ka PDF ki la kyntait ban kren shai halor kane ka bynta hynrei kane ka jingmih khubor ka lah ban urlong namar ba na ka liang u Symbud Myntri rangbah ka Jylla u ba long ruh u nongïalam ka NPP u la kam ba kan don ka jingkylla ha ka saiñpyrthei ha ka jylla .
Haba kylli ïa kane na u Symbud Myntri rangbah halor ka jingkylla ka saiñ pyrthei ha ka jylla kumba u la kam u la ong ” Ngam lah ban kren ne ïathuh eiei mynta hynrei ïa kane phin sa ïohi tang da la wan ka 6 tarik lane ka 7 tarik terter ïaka ei kata ka jingkylla ha ka saiñpyrthei”.
Lada shu kdew ka jing-kylla kaba u Bah Tynsong u kam ba kan sa don ka lah ban long na ka jingwan pynïasoh kiwei ki MLA na kiwei ki seng ki ba lah ban pynkiew ïa ka jingdon ki MLA ha ka NPP, kaba mynta ki don 26 ngut ki MLA.
Haba kylli kane ka jylla hato kan dei na ki MLA ki ba lah ban pynïasoh sha ka NPP, u la ong ba ngam lah ban jubab ïa kata, mynta hynrei hap ban ap ïa ka 6 tarik lada phi kwah tip”.
