SHILLONG:
U Working President ka United Democratic Party u Bah Paul Lyngdoh haba kren bad ki nongthoh khubor halor ka jingleit ban kren jong ki nongïalam ka VPP halor ka reservation policy bad roster system ha kylleng sawdong u la ong, “Ngam long uba pynpaw ïa ka jingpyrshah kum ma ki, nga don don hangne ban trei da kaba jai jai, ban pynurlong kum u dkhot jong ka ïingdorbar thawaiñ bad kum u Myntri Sorkar ha ka kynhun Myntri.”
U la bynrap da kaba ong, “Nga la leh bun kiei kiei na ka bynta ka jylla bad kam mut ba man ka por ba nga leh eiei ngan kiew sha jrong tnum jong ka Secretariat bad pyrta ba kane ka dei kaba nga la leh.”
Une u nongïalam ka UDP uba dei ruh u Myntri ka sorkar u la ïathuh ba ka jingïakynduh halor ka Roster System kan long mar sien dep ka ilekshon ha Sohïong kata hadien ka 13 tarik Jymmang.
“Kin sa khot ïa ka jingïakynduh lang jong baroh ki seng saiñ hima sima, ka kynhun Myntri,” u la ong.
U la ong ruh ba kumno ki thep vote, phi thep ïa ka seng katkum ka jingkular ha ki mat ïalap ilekshon bad lada kata ka seng kam ïoh ïa uta u number ka mut ba ki la shah kyntaid.
Na kata ka daw mynta ka don ka MDA II, ka MDA ka kynthup ïa ki artylli ki seng saiñ hima kata ka NPP kaba la jop bun na rilum Garo bad phra ngut na Khasi Jaiñtia bad kaba ar ka UDP kaba jop 11 ngut ki MLA na Khasi Jaiñtia bad 0 na rilum Garo.
“Ngi don hangne ban pynurlong ïa ka rai jong u paidbah, bad kumba ka paw ki paidbah kim ai lad tang ka wei ka seng ban synshar, na kata ka daw ki artylli ki seng ki wan sha khmat ban ïatreilang,” u la ong.
Haba ïadei bad ka ilekshon ha Sohïong bad ka jingjur jong ka jingïakynthah hapdeng kine ki artylli ki seng, u Bah Paul u la ong ba ka jingdon ilekshon tang ha kawei ka konstitwensi ki don por lut baroh, na pdeng ki nongkren kiba bun, kin don beit kiba kren tam, kata ka ju jia biet.
“Ki don ki nongkren kiba tbit hynrei ka jingïalap ilekshon ha ka jylla Meghalaya kam pat poi ha kata ka kyrdan kumba ka long ha West Bengal ne ha UP, ka dang don ka akor ka burom, iwei ar ngim lah lait,” ong u Bah Paul.
Shuh shuh u la ong ruh ba ka UDP ka don ka lad ban jop namar ki don u kyrtong uba ki paidbah ki ieid, uba la biang ka jingnang jingstad, bad ki briew ki peit na ka ïing ka sem kaba u wan.
